د جمعیت اسلامي رهبرۍ شورا د ملي اردو له انحلال سره مخالفت وکړ

کابل (پژواک،۱۴ سلواغه ۹۷): د جمعیت اسلامي رهبرۍ شورا د ملي اردو د ړنګېدو په اړه د عباس ستانکزي په خبرو غبرګون څرګند کړ او ویې ویل، د یاد ګوند یو شمېر غړي د شخصي ګټو لپاره له ټاکنیزو ټکټونو سره یو ځای شوي دي.

 د راپورونو له مخې، په قطر کې د طالبانو د سیاسي دفتر مرستیال شېرمحمد عباس ستانکزي په خپلو تازه څرګندونو کې ویلي، د سولې په خبرو کې د طالبانو له یو ځای کېدو سره به د امنیتي ځواکونو تشکیل له منځه لاړ شي.

 هغه ویلي: ((د امریکايي ځواکونو له وتلو وروسته به نور دغه سرتېري نه وي، ځکه زما په نظر د امنیتي ځواکونو دا تشکیل امریکا جوړ کړی او کله چې امریکايان له هېواده وځي دوی هم له منځه ځي، ځکه د موجودیت دلیل یې پای ته رسېږي.))

 د جمعیت اسلامي د رهبرۍ شورا رییس سید ابراهیم عماد نن په کابل کې د یوې خبري ناستې پر مهال د عباس ستانکزي څرګندونو ته په اشاره وویل: ((ملي اردو د هېواد له رښتینو بچیانو جوړه شوې او زموږ په بدن کې د زړه حیثیت لري او موږ ترې ملاتړ کوو. موږ د حکومت او ملي اردو د له منځه تلو سل سلنه مخالف یو.))

 نوموړي زیاته کړه، افغانان په ځانګړې توګه د جمعیت رهبري شورا به د طالبانو د یادې غوښتنې په اړه چوپ پاتې نه شي.

 عماد وویل: ((له بده مرغه موږ ناځوانه ګاونډیان لرو، امن افغانستان د دوی په ګټه دی، دا د طالبانو غوښتنه نه، بلکې د سیمې د استخباراتو غوښتنه ده... هر ډول قربانۍ ته تیار یو، خو چا ته اجازه نه ورکوو چې زړه مو واخلي.))

 هغه سوله د ملت په خیر وبلله او زیاته یې کړه: ((موږ داسې سوله غواړو چې ملي ګټې او ۱۷ کلنې لاسته راوړنې مو په کې خوندي وي، سوله ملي اړتیا ده او د افغانانو په اړه اجماع هم لري، خو هغې سولې ته چې د پاکستان په ښارونو کې تنظیمېږي اړتیا نه لرو.))

 خو نوموړي هغو راپورونو ته په اشاره چې د لنډمهاله حکومت جوړېدل ګني د سولې د خبرو برخه ده وویل، د دغه ډول حکومت په جوړېدو د تېرو ۱۷ کلونو ټولې لاسته راوړنې له منځه ځي.

 هغه د طالبانو له تحریکه وغوښتل چې له افغانانو سره سوله وکړي، ځکه د ده په خبره په هغه صورت کې چې د ملت څنګ ته رانه شي د ملت په منځ کې به ځای نه شي.

 ده وویل، د جمعیت رهبري شورا تیاره ده چې د سیاسي ډیالوګ له لارې له طالبانو سره تفاهم وکړي.

 عماد زیاته کړه: ((زموږ غوښتنه مخامخ خبرې دي، که دا کار ونه شي خلکو ته ډاډ ورکوم چې د تېر په څېر به د وینې په بیه د خپلو خلکو ملاتړ وکړو.))

login or register a new account.