<p style="text-align: justify;">جلالاباد (پژواک، ۹ سلواغه ۱۴۰۳): د ننګرهار د پوهنې رياست او د دغه ولايت د ډاکټرانو اتحادیې يوه هوکړه لاسلیک کړې چې له مخې يې له دې وروسته ډاکټران په خپلو شخصي کتنځايونو کې له ښوونکو فیس نه اخلي.</p>
<p style="text-align: justify;">د معلوماتو له مخې، ښوونکي به د خپل هويت کارت په ورښودو چې څرګنده کړي په دولتي ښوونځي کې ښوونکی دی، له دغو خدماتو برخمن کېږي.</p>
<p style="text-align: justify;">په ننګرهار کې د ډاکټرانو اتحاديې مشر ډاکټر عبدالواقف نيازي د سلواغې په ۹مه پژواک خبري اژانس ته وويل چې دوی نن د پوهنې رياست سره يو هوکړهلیک لاسلیک کړ چې له مخې به یې ټول ډاکټران په خپلو شخصي کتنځايونو کې له ښوونکو فیس نه اخلي.</p>
<p style="text-align: justify;">دی وايي، دغه کار ځکه وشو چې د ښوونکو معاشونه کم دي او دغه لږه مرسته به د هغوی لپاره ډېره ګټوره تمامه شي.</p>
<p style="text-align: justify;">بلخوا، د ننګرهار د پوهنې رياست هم د يوې اعلامیې په خپرولو تایید کړې چې د پوهنې د رییس او د ننګرهار ولايت د ډاکټرانو اتحادیې د مشر ترمنځ دغه هوکړه نن لاسلیک شوه.</p>
<p style="text-align: justify;">په اعلامیه کې راغلي چې د پوهنې رييس شیخ محمدشریف حلیمي دا يو ګټور کار ياد کړ او هيله يې وښوده چې دا لړۍ لا نوره هم پراخه شي.</p>
<p style="text-align: justify;">بل لور ته ښوونکي هم دغه چاره ګټوره بولي.</p>
<p style="text-align: justify;">د ننګرهار د مرکز جلالاباد ښار د يوه دولتي ښوونځي ښوونکي عبدالرحمن پژواک ته وويل، ښوونکو تل د خلکو د روزنې لپاره قرباني ورکړې، په ډېرو کمو امتيازاتو يې ژوند مخې ته وړی خو نور خلک يې تر لوړو پوړونو رسولي دي.</p>
<p style="text-align: justify;">دی وايي، لومړی ځل دی چې د ښوونکو زدهکوونکي د هغوی د ستړیاوو يوه ناچیزه بدله ورکوي چې د ښوونکو لپاره د ډېر ویاړ ځای دی.</p>
<p style="text-align: justify;">په ټولنيزو شبکو کې هم د دې چارې پراخ هرکلی شوی او دا يې د ډاکټرانو قرباني ياده کړې ده.</p>
<p style="text-align: justify;">دا په داسې حال کې ده چې دوه ورځې وړاندې د خوست د ډاکټرانو اتحاديي هم ورته پرېکړه کړې او ویلي یې دي چې له دې وروسته د دولتي او شخصي ښوونځیو له ښوونکو فیس نه اخلي.</p>
