“میدان وردګو کې د ماین چاودنې د عامه نظم پنځه سرتیري ټپیان کړل”

ميدان ښار (پژواک، ۳۰ وری ۹۹): چارواکي وایي، د میدان وردګو ولایت په مرکز کې پر هاموې ټانک د ماین چاودنې، د عامه نظم ځواکونو پنځه سرتیري ټپیان کړل، خو یوه سرچینه د دغو کسانو د وژلو ادعا کوي.

د ميدان وردګو د امنيې قوماندانۍ وياند څارمن حاجي محمد هوفياني پژواک خبري اژانس ته وويل چې دغه چادونه نن له غرمې مخکې شاوخوا لس بجې هغه مهال وشوه چې د عامه نظم او د ملي امنيت ځواکونو د د دغه ولایت د نرخ ولسوالۍ ته اکمالات کول.

هغه وايي چې په دغه چاودنه کې د عامه نظم ځواکونو پنځه سرتیري ټپیان شوي دي.

د ده په وينا، په یاده سیمه کې نن له غرمې وروسته تر دوو بجو د دولتي ځواکونو او وسله والو مخالفینو تر منځ جګړه هم روانه وه.

هغه د جزییاتو له ورکولو پرته وویل چې په دغې نښته کې وسله والو مخالفينو ته هم مرګ ژوبله اوښتې ده.

خو د ده افغانانو یو تن اوسېدونکی عصمت الله وایي چې په یاده چاودنه کې د دولتي ځواکونو ټانک په بشپړ ډول له منځه تللی.

دی زياتوي:«ټانک ټوټې ټوټې پروت و،  پنځه تنه مړي یې ورنه راواېستل او په امبولانس کې يې يووړل.»

 وسله والو مخالفينو تر دې دمه په دې اړه څه نه دي ويلي.