د افغانستان او اماراتو ترمنځ د بانکي اړیکو پر عادي کولو خبرې وشوې

کابل (پژواک، ۲۱ مرغومی ۱۴۰۳): د بهرنيو چارو سرپرست وزیر د متحده عربي اماراتو د اقتصاد له وزیر سره د کانونو د استخراج، د کرنې میکانیزه کولو، اماراتو ته د افغانو کارګرو لېږد او دواړو هېوادونو ترمنځ د بانکي اړيکو عادي کولو په اړه خبرې کړې.

د بهرنیو چارو وزارت د ویاند مرستیال ضاءاحمد تکل پر خپله اېکس‌پاڼه ليکلي چې تېره ورځ د افغانستان د بهرنیو چارو سرپرست وزیر مولوي امیرخان متقي او د متحده عربي اماراتو د اقتصاد وزیر عبدالله بن طوق المري او مل پلاوي سره پر یو شمېر اقتصادي مسائلو یې خبرې کړې.

سرچينه لیکي، عبدالله بن طوق المري د متحده عربي اماراتو اوسنی اقتصادي وضعیت تشریح او د افغانستان – اماراتو ترمنځ د سوداګرۍ پراختیا ته یې خپله ژوره لیوالتیا څرګنده کړه.

سرچینه زیاتوي، مولوي امیرخان متقي د افغانستان د اقتصادي وضعیت، د پانګونې شته فرصتونو او د سوداګرۍ په برخه کې د همکاریو په اړه معلومات ورکړل.

سرچينې ليکلي: «په دې کتنه کې د معادنو استخراج، د کرنې میکانیزه کولو، د زراعتي محصولاتو لپاره د بازار موندنې،  په سوداګرۍ کې د اسانتیاوو په رامنځته کولو، د دواړو هېوادونو تر منځ د سوداګرۍ او د ترانزیټ پراختیا، اماراتو ته د افغان کارګرانو لېږد، د بانکي اړیکو عادي کول او د سوداګرۍ خونو ترمنځ د همکاريو په باب هر اړخیز بحثونه ترسره شول.»

تکل زیاتوي، دواړو لورو هوکړه وکړه چې د یادو مواردو د پلي کولو لپاره به تخنیکي ټیمونه  ټاکي څو یاد پروګرامونه په اغېزمن ډول عملي او دوه اړخیزې اقتصادي اړیکې پیاوړې شي.