په هرات ښار کې یو څارنوال وژل شوی

هرات ښار (پژواک، ۱۸ لړم ۹۹): د هرات ولایت امنیتي چارواکي وايي چې ناپېژاندو وسله والو په هرات ښار کې یو څارنوال وژلی دی.

د هرات د امنیې قوماندانۍ د مطبوعاتي دفتر سرپرست عتیق الله وثیق پژواک ته وویل چې نن سهار شاوخوا اته بجې یو څارنوال عبدالسمېع رحمتي له کوره دفتر ته د تلو پر مهال د دوولسمې ناحیې په (بابا حاجي) سیمه کې د دوو موټرسایکل سپرو له خوا په ډزو وژل شوی دی.

د هغه په وینا، د دې پېښې عاملین له سیمې تښتېدلي او د نیولو لپاره یې د پولیسو پلټنې پیل شوې دي.

هغه زیاته کړه چې د یادې پېښې انګېزه تر اوسه نه ده معلومه.

دغه څارنوال په داسې مهال وژل شوی چې په دې وروستیو کې په هرات ښار کې وژنې او وسله والې غلاوې ډېرې شوې دي.

په ورته مهال، د وژل شوي څارنوال خپلوانو نوموړی په نیکۍ یاد کړ او ویې ویل چې عبدالسمېع رحمتي تل د بې عدالتۍ پر وړاندې مبارزه کوله.

د هرات اوسېدونکي د وژنو او وسله والو غلاوو د زیاتوالي په اړه اندېښمن دي او امنیتې بنسټونه د امنیت په ټینګښت او د ترور او غلاوو د عاملینو په نیولو کې پر لټۍ تورنوي.

د هرات یوه اوسېدونکي حبیب الله یارزاده پژواک ته وویل: "له بده مرغه امنیتي وضعیت دومره خراب شوی چې هره شپه یو یا دوه کسان ترور او یا د غلو له خوا وژل کېږي او حکومت هم هېڅ هڅه نه کوي."

دا په داسې حل کې ده چې دوه ورځې وړاندې د ولایت مقام ته څېرمه غلو یو تن وواژه او یو بل یې ټپي کړ.