کابل (پژواک، ١٩ لېندۍ ٩٩): د عامې روغتیا وزارت وایي چې تمه ده تر راتلونکو اوو میاشتو د کرونا ویروس واکسین هېواد ته راشي او اوس یې د ساتلو لپاره د ځانګړو استنځایونو پر جوړولو کار روان دی.
د عامې روغتیا وزارت ویاند اکمل سمسور نن په کابل کې په یوه خبري ناسته کې وویل چې افغانستان به له دوو مرجعو د کرونا واکسین ترلاسه کړي او تمه ده تر راتلونکو ۷ میاشتو د کرونا ویروس واکسین لومړی بسته هېواد ته را ورسېږي.
هغه زیاته کړه: «دغه واکسین به تر اوو یا اتو میاشتو هېواد ته را ورسېږي چې د هېواد درې سلنه خلک تر پوښښ لاندي راولي او په لومړي پړاو کې به د اړتیا او زیان لېدونکو کسانو او ډلو پر اساس دغه واکسین ورکول کېږي.»
سمسور وویل چې د هېواد د شل سلنه خلکو لپاره د دوو کلونو په موده کې نړیوال بانک هم واکسین چمتو کوي او که په بازار کې د واکسینو تولید ډېر شي، هېواد ته په واردولو کې به یې هم بدلون راشي.
سرچینې لیکلي چې دا مهال د واکسین ساتلو لپاره د ځنځیري سړې خونو په جوړولو کار روان دی.
د عامې روغتیا وزارت ویاند وویل چې بله برخه د کرونا واکسین د چمتو کولو، د واکسین د تطبیق لپاره ځانګړو کارکوونکو ته روزنه ورکول دي چې کار پرې روان دی او هغه کسانو ته چې واکسین ورکړل شي، د پېژندنې یو کارت ورکول کېږي.
سمسور دغه راز له خلکو وغوښتل چې پر کرونا ویروس د اخته کېدو مخنیوي لپاره وقایوي ټکي په پام کې ونیسي او ماسکونه وتړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن