کابل (پژواک، ٢٦ لېندۍ ٩٩): ولسمشر اشرف غني وايي، د کرونا واکسین د چمتو کولو او وېش لپاره دې منظم پلان جوړ او د واکسین ساتلو لپاره باید په روغتونونو کې د سړو خونو د ظرفیت پر لوړولو کار وشي.
له ارګه د لېندۍ په ٢٦مه پژواک اژانس ته په رالېږل شوې خبرپاڼه کې راغلي، د ولسمشر محمد اشرف غني په مشرۍ د کرونا له دویمې څپې سره د مبارزې غونډه نن سهار جوړه شوه.
سرچينې زياته کړې، ولسمشر غني وویل، د کرونا وبا دویمه څپه ممکن د یو عامل په توګه روغتیایي ستونزې زیاتې کړي، نو عامې روغتیا وزارت دې د روغتیایي ستونزو کمولو او حل په موخه خپل اقدامات زیات کړي.
هغه په روغتونونو کې د اکسېجن ستونزې پر اساسي حل ټينګار وکړ او وې ویل، په لومړي ګام کې باید د اکسېجن د کمښت ستونزې د حل په موخه ټول اړین وسایل او منابع برابر او په دویم ګام کې په روغتونونو کې د اړتیا وړ اکسېجن پر تولید تمرکز وشي.
په خبرپاڼه کې راغلي، د افغانستان لپاره د ملګرو ملتونو ځانګړې استازې دیبورا لانیس چې په دې غونډه کې يې ګډون کړی و، وویل: “موږ د خپلې ژمنتیا له مخې دېته چمتو یو چې د روغتیا نړیوال سازمان (WHO) او د ماشومانو ملاتړ نړیوال صندوق (UNICEF) د افغانستان د حکومت غوښتنې پر اساس همکاري وکړو.”
په افغانستان کې د ماشومانو ملاتړ نړیوال صندوق مرستیالې شیماسن ګوپتا او د روغتیا نړیوال سازمان استازي ډیویډلي د خپلو کړنو په اړه د راپورونو وړاندې کولو پر مهال له روغتونو سره د اکسېجن برابرولو په برخه کې د شوو مرستو یادونه هم وکړه.
سرچينې زياته کړې، د کرونا وبا د دویمې څپې مدیریت په موخه په دې جوړه شوې غونډه کې د کابل، هرات، بلخ او ننګرهار روغتونونو ستونزې و ارزول شوې او د حل لپاره یې لازمې لارښوونې وشوې.
ولسمشر غني د عامې روغتیا وزارت او نړيوالو مرستندویه موسسو پر ښه انسجام، مدیریت او همغږۍ د ټینګار ترڅنګ وویل، عامې روغتیا وزارت او اړوندې همکارې موسسې باید د کرونا وبا د دویمې څپې په اړه واضح تصویر ولري، څو د هغه په رڼا کې اړین اقدامات وشي او روغتیایي سیستم له جدي ستونزو سره مخ نه شي.
هغه د کرونا وبا د دویمې څپې د مخنیوي په موخه خلکو ته لارښوونې او عامه پوهاوی اړین وباله او وې ویل، د واکسین چمتو کولو او وېش لپاره دې منظم پلان جوړ او د واکسین ساتلو لپاره باید په روغتونونو کې د سړو خونو د ظرفیت پر لوړولو کار وشي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن