پروان کې یو کس د وسلو او مهماتو پلور په تور نیول شوی

چاریکار (پژواک، ۹ مرغومی ۹۹): په پروان کې د امنیتي سرتېرو د همغږۍ مرکز په دغه ولایت کې د «ام شانزده امریکايي» مرمیو په ګډون د وسلو او مهماتو پلور په تور د یو کس د نیولو خبر ورکوي.

په پروان کې د امنیتي سرتېرو همغږۍ مرکز قوماندان محمد حامد نیازي وویل، نیول شوی کس رامین نومېږي او د پروان ولایت د سیدخېلو ولسوالۍ د قلعه کهنه اوسېدونکی دی.

هغه زیاته کړه چې رامین نن سهار (د مرغومي نهمه) ‌په قلعه کهنه سیمه کې په داسې حال کې نیول شوی چې د ام شپاړس امریکايي وسلې ۱۶۰۰ مرمۍ، څلور لاسي بمونه، یوه میکاروب تومانچه او یو کلاشینکوف په یوه موټر کې نامعلوم ځای ته لېږدول.

نوموړي وویل، رامین په څېړنو کې خپل جرم (د وسلو پلور) منلی دی.

نیازي وویل، نیول شوی کس د ډېرو څېړنو لپاره د پروان مرکز ته انتقال شوی دی.