مسوولين: جلال اباد کې د داعش مالي مسوول نيول شوى

جلال اباد (پژواک، ١٠ مرغومى ٩٩): د ننګرهار حکومتي مسوولين وايي چې په جلال اباد ښار کې د داعش ډلې د مالي مسوول په ګډون شپږ کسان نيول شوي دي.

د ننګرهار د ولايت مقام مطبوعاتي مسوول عطاءالله خوږياڼي د مرغومي په لسمه پژواک خبري اژانس ته وويل چې جلال اباد ښار کې د داعش ډلې مالي مسوول نیول شوى دى.

هغه وايي چې د ننګرهار ولایت مرکز جلال اباد ښار څلورمې ناحیې اړوند بیزاکمالاتي سیمه کې د ملي امنيت ځانګړو ځواکونو شپني عملیات ترسره کړي، چې په پایله کې یې د داعش ډلې مالي مسوول او درې نور شکمن کسان نیولي شوي دي.

د هغه د معلوماتو له مخې،نیول شوی کس چې نابينا دی، په تېر کې یې د افغان دولت پر خلاف تبلیغات او داعش ډلې ته یې د جلب او جذب لپاره تقریرونه هم کړي دي.

دغه راز ده وويل چې د ننګرهار ولايت مرکز جلال اباد ښار او تورخم ښارګوټي کې د ملي امنيت موظفينو د وسله والو طالبانو دوه غړي نيولي دي.

خوږياڼي وايي چې په نيول شويو کسانو کې يو تن چې اصلي د ننګرهار حصارک ولسوالۍ اوسېدونکی دی، خو اوسمهال په پاکستان هېواد کې ژوند کوي او يو تن بل د کونړ ولايت اوسېدونکی دی.

د هغه په وينا، نيولو شويو کسانو پر خپلو جرمونو اعتراف کړی د‌ى.

بل لورته داعش او طالبانو تر اوسه په دې اړه څه نه دي ويلي.

Views: 2