له کابل څخه قطر ته د سولې مرکچي پلاوي سفر سبا ته وځنډېد

کابل (پژواک،۱۵مرغومى ۹۹): له کابل نه قطر ته د سولې د مرکچي پلاوي سفر، چې ټاکل شوې وه نن له غرمې وروسته تر سره شي، د ځینو تخنیکي ستونزو له امله سبا ته وځنډېد.

د افغانستان د اسلامي جمهوریت او طالبانو مرکچي پلاوي په قطر کې له شاوخوا اتيا ورځو بحثونو وروسته د سولې خبرو پر تګلاره هوکړه وکړه او بیا یې له مشرانو سره د سلا مشورو لپاره درې اوونۍ خبرې ودرولې.

ټاکل شوې وه چې کابل ته د مرکچِي پلاوي راغلي کسان نن له غرمې وروسته قطر ته ولاړ شي، خو د سولې په چارو کې د دولت وزارت مطبوعاتي دفتر او د یاد پلاوي یوه غړي د جزییاتو له ورکولو پرته پژواک خبري اژانس ته وویل چې دغه سفر د تخنیکي ستونزو له امله سبا ته ځنډېدلی دی.

د مرکچي پلاوي غړې فوزیې کوفي هم نن کابل کې خبریالانو ته وویل چې دغه پلاوی به سبا قطر ته ولاړ شی.

دا په داسې حال کې ده چې ټاکل شوې وه سبا (د مرغومي په ۱۶مه) د دواړو لورو مرکچي پلاوي دوحه کې د سولې خبرو دویم پړاو پیل کړي.

Views: 2