<p style="text-align: justify;">کابل (پژواک، ۳۰ لړم ۱۴۰۳): د کرنې وزارت سرپرست په کابل کې د جاپان له سفیر سره په لیدنه کې افغانستان سره د کرنې برخه کې د دغه هېواد د مرستو د دوام غوښتنه وکړه او ویلي یې دي چې مرستې به په شفاف ډول مصرف شي.</p>
<p style="text-align: justify;">د کرنې، اوبو لګولو او مالدارۍ وزارت نن (چهارشنبه، د لړم ۳۰مه) د یوې <strong><a href="https://www.mail.gov.af/ps/%D8%AF-%DA%A9%D8%B1%D9%86%DB%90-%D9%88%D8%B2%DB%8C%D8%B1-%D8%AF-%D8%AC%D8%A7%D9%BE%D8%A7%D9%86-%D9%84%D9%87-%D8%B3%D9%81%DB%8C%D8%B1-%D8%B3%D8%B1%D9%87-%D9%84%DB%8C%D8%AF%D9%86%D9%87-%D9%88%DA%A9%DA%93%D9%87">خبرپاڼې</a> </strong>په خپرولو سره لیکلي چې د دغه وزارت سرپرست مولوي عطاءالله عمري په کابل کې د جاپان له سفیر تاکایوشي کورومایا سره وکتل او دواړو خواوو د جاپان حکومت د کرنې او مالدارۍ برخه کې د همکاریو او د ډاکټر تتسو ناکامورا د پروژو د تطبیق په اړه خبرې وکړې.</p>
<p style="text-align: justify;">سرچینې ویلي چې یاده لیدنه کې د کرنې وزارت سرپرست له افغانانو سره د جاپان دولت او ملت د تلپاتې همکاریو مننه او د دې مرستو د دوام غوښتنه یې وکړه.</p>
<p style="text-align: justify;">هغه د جاپان له دولت سره د ښو اړیکو او له اسلامي امارت او د کرنې او مالدارۍ له سکټور څخه د هغوی د ملاتړ ستاینه وکړه او زیاته یې کړه: «د څو لسیزو اوږدې جګړې د دې سکټور د شاتګ لامل شوې او موږ مرستې ته اړتیا لرو چې له دې وضعیت څخه راووځو او موږ کلک هوډ لرو چې ستاسو مرستې په روڼټیا او اغیزناک ډول وکارول شي او زموږ بزګران او مالداران ترې ګټه پورته کړي.»</p>
<p style="text-align: justify;">هغه د اسلامي امارت له لوري د کوکنار د کښت منع کولو او بشپړ له منځه وړلو ته په اشارې زیاته کړه: «موږ د معیشت بدیل لپاره یو جامع طرحه لرو، د هغې په چوکاټ کې سازمانونه، دولتونه او بهرني مرستندویان کولی شي همکاري وکړي، په ځانګړې توګه د ښځو لپاره؛ ځکه چې په افغانستان کې د بزګرۍ او مالدارۍ ډېری کارونه ښځې ترسره کوي.»</p>
<p style="text-align: justify;">دغهراز سرچینې زیاته کړه، د جاپان سفیر د اداري له فساد سره د مبارزې، د نشهيي توکو د کښت او قاچاق د مخنیوي، د ترهګرۍ ضد مبارزې، د امنیت تامین او د سولې لپاره د اسلامي امارت د هڅو ستاینه وکړه.</p>
<p style="text-align: justify;">هغه د خپلو خبرو په دوام افغانستان کې په بدیل معیشت، سبزیجاتو، د نشهيي توکو پر وړاندې مبارزې، د ناکامورا پروژو پلي کول او د اوبو لګولو پروژو برخو کې د جاپان د فعالیتونو د دوام په اړه خبرې وکړي.</p>
