د امريکا دفاع وزير: له افغانستان څخه د خپلو سرتېرو ايستلو کې بېړه نه کوو

کابل(پژواک، د کب لومړۍ نېټه ۹۹): د امريکا دفاع وزير ويلي چې هېواد يې په افغانستان کې له ديپلوماټيکو لارو د جګړې پاى ته رسولو ته ژمن دى او خپل سرتېري په بېړه له دغه هېواده نه وباسي.

د امريکا د فاع وزير لویډ استین د ناټو غړو هېوادونو د دفاع وزيرانو د دوه ورځنۍ غونډې ګډونوالو ته چې په انلاين بڼه جوړه شوې وه ډاډ ورکړ چې دوى له افغانستانه خپل سرتېري په بېړه او بې نظمۍ نه وباسي.

له پنټاګون څخه په خپره شوې خبرپاڼه کې د امريکا ددفاع وزير له خولې ويل شوي، چې امريکا په اوسنيو شرايطو له طالبانو سره د تړون د ارزونې په حال کې ده، ترڅو مشخصه شي چې ايا دواړه خواوې د شرايطو پايند دي که نه .

هغه ويلي چې امريکا د افغانستان جګړې د پاى ته رسولو لپاره ديپلوماټيکو هڅو ته ژمن ده او په ټولو پړاونو کې به له خپلو متحدينو سره مشورې کوي.

د ناټو ددفاع وزيرانو دوه ورځنۍ غونډه پرون له کومې پرېکړې پرته پاى ته ورسېده.