کابل (پژواک، ۳ لېندۍ ۱۴۰۰): د افغانستان لپاره د جاپان سفیر د ريیس الوزرا له سیاسي مرستیال سره په لیدنه کې ویلي، جاپان غواړي چې د افغانستان له نوي حکومت سره خپلو کارونو ته دوام ورکړي او پرېکړه یې کړې چې که یې د امنیت خوندیتوب ډاډمن شي، خپل سفارت هم بېرته پرانیزي.
د حکومت مرستیال ویاند انعام الله سمنګاني پر خپله ټوېټرپانه لیکلي چې پرون د ریاست الوزرا سیاسي مرستیال مولوي عبدالکبیر د جاپان له سفیر تاکاشي اوکاتا سره په سپېدار ماڼۍ کې ولیدل.
ده لیکلي د ریاست الوزرا سیاسي مرستیال د جاپان سفیر ته د ښه راغلاست ویلو ترڅنګ د دواړو هېوادونو ترمنځ مناسبات تاریخي وبلل.
سرچینې د سفیر له قوله لیکلي: «زموږ پیغام دا دی چې د افغانستان د خلکو ملاتړ ته دوام ورکوو.»
ده زیاته کړې، جاپان غواړي چې له نوي حکومت سره خپلو کارونو ته دوام ورکړي او د باور جوړولو په موخه په لومړي قدم کې له افغانستان سره خپلې مرستې زیاتوي او یادې بشري مرستې باید افغانستان ته د ژمي له را رسېدو مخکې ورسېږي.
په دغه متن کې راغلي، د جاپان سفیر په افغانستان کې د اقتصادي بحران د مخنیوي او د دواړو هېوادونو ترمنځ پر اړیکه ټینګار کړی دی.
سمنګاني د جاپان د سفیر له قوله لیکلي: «موږ تصمیم لرو چې د امنیت له ډاډمنېدو وروسته خپل سفارت بېرته پرانیزو او د عملي اقداماتو په موخه باید یو ګډ چوکاټ جوړ شي.»
Visits: 29
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن