ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

پاکستان: د اسلامي سازمان غونډه له بشري ناورینه د افغانستان د وتلو پر لارو چارو غور کوي

پاکستان: د اسلامي سازمان غونډه له بشري ناورینه د افغانستان د وتلو پر لارو چارو غور کوي

author avatar
18 Dec 2021 - 01:27
پاکستان: د اسلامي سازمان غونډه له بشري ناورینه د افغانستان د وتلو پر لارو چارو غور کوي
ارشیف
author avatar
18 Dec 2021 - 01:27

کابل (پژواک، ۲۶ لېندۍ ۱۴۰۰): پاکستان وایي، په اسلام اباد کې د افغانستان په تړاو د اسلامي هېوادونو غونډه له میلیونونو افغانانو سره بشري مرستو ته د لارې هوارولو لپاره جوړیږي، خو دا په دې معنا نه ده چې د افغانستان نوی حکومت پر رسمیت پېژني.

ټاکل شوې چې دغه غونډه د اسلامي سازمان غړو هېوادونو د استازو په ګډون سبا یکشنبې (د لېندۍ ۲۷مه) په اسلام اباد کې جوړه شي.

د پاکستان د بهرنیو چارو وزیر شاه محمود قریشي پرون په اسلام اباد کې خبریالانو ته وویل، د یاد سازمان ټولو غړو هېوادونو په دغه کنفرانس کې د ګډون بلنه منلې او د امریکا، چین، بریتانیا، روسیې او فرانسې استازي هم په کې ګډون کوي.

ټاکل شوې چې د افغانستان د بهرنیو چارو سرپرست وزیر مولوي امیرخان متقي د یوه پلاوي په مشرۍ په دې غونډه کې ګډون وکړي.

قریشي وایي، په دې ناسته کې- چې پرانيستونکې وینا به یې د پاکستان لومړی وزیر عمران خان کوي- نړیوالې ټولنې ته د افغانستان د وروستیو حالاتو په اړه معلومات ورکول کېږي.

د هغه په وینا، په غونډه کې په افغانستان کې له روان بشري ناورینه د وتلو پر لارو چارو غور کېږي او هڅه به وشي چې له دې لارې له میلیونونو افغانانو سره- چې له بد اقتصادي وضعیت سره مخ دي- په بېړنۍ توګه بشري مرستو ته لاره هواره شي.

خو ده زیاته کړه چې له دې ناستې موخه دا نه ده چې ګواکې د افغانستان اوسنی سرپرست حکومت دې پر رسمیت وپېژندل شي.

د راپورونو له مخې، د اسلامي کنفرانس سرمنشي حسین ابراهیم طه په دې ناسته کې د ګډون لپاره اسلام اباد ته رسېدلی او له پاکستاني چارواکو سره یې د کنفرانس پر څرنګوالي خبرې کړې دي.

د افغانستان سرپرست حکومت چې شاوخوا درې میاشتې مخکې جوړ شوی، تر اوسه کوم هېواد پر رسمیت نه دی پېژندلی.

د افغانستان د پخوانی حکومت له ړنګېدو وروسته د امریکا متحده ایالتونو د افغانستان نږدې لس میلیارد ډالره پانګه کنګل کړه او پر افغانستان یو لړ نور بندیزونه هم ولګول شول چې له امله یې افغانان له سختو اقتصادي ستونزو سره مخ دي.

Visits: 148

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.