خلک کولای شي سر له نن څخه د پاسپورټ غوښتنې انلاین فورمې ډکې کړي

کابل (پژواک،۴ مرغومی ۱۴۰۰): د حکومت یو چارواکی وایي چې د پاسپورټ مراجعین کولای شي سر له ننه یوازې له انلاین لارې د پاسپورټ غوښتنې فورمې ډکې کړي.

دغه څرګندونې تېره ورځ د حکومت مرستیال ویاند انعام الله سمنګاني پر خپله ټویټر پاڼه لیکلي دي.

هغه زیاته کړې چې حکومت دغه پرېکړه د ګڼې ګوڼې او خلکو د تکلیف د مخنیوي په موخه کړې ده.

د سرچینې په خبره د پاسپورټ ریاست ویب پاڼه فعاله ده .

سمنګاني دې ته په اشاره چې له دې وروسته به سفارشي لیکونه او ورقې نه منل کېږي ویلي چې سر له نن څخه کاغذي عرض پاڼې هم نه منل کیږي او احکام پرې نه صادرېږي.

د پژواک د یوه خبر په اساس چې د لېندۍ په ۲۷ خپور شوی، د پاسپورټ ریاست عمومي رییس عالم ګل حقاني ویلي و چې د پاسپورټ غوښتونکو لپاره نوې انلاین فورمې ډیزاین شوې او تېرې انلاین فورمې د اعتبار وړ نه دي.

Views: 416