<p style="text-align: justify;">کابل (پژواک، ۱۴ سلواغه ۱۴۰۴): د راپورونو پر بنسټ، تمه کېږي چې د منځني ختیځ لپاره د امریکا ځانګړی استازی او د ایران د بهرنیو چارو وزیر د راتلونکې جمعې ورځ په ترکیه کې سره وګوري.</p>
<p style="text-align: justify;">«اکسیوس» رسنۍ د دوو باخبره سرچینو او د امریکا د یوه چارواکي له قوله راپور ورکړی چې د منځني ختیځ لپاره د امریکا ځانګړی استازی سټېف ویټکاف او د ایران د بهرنیو چارو وزیر سیدعباس عراقچي به د څو عربي هېوادونو د استازو په حضور کې د جمعې په ورځ د ترکیې په استانبول ښار کې سره وګوري.</p>
<p style="text-align: justify;">یوه بله باخبره سرچینه چې له دغه پلانه خبره ده، ویلي چې د جمعې ورځې ناسته «تر ټولو ښه ممکنه سناریو» ده؛ خو تر هغو چې دا لیدنه ترسره نه شي، هیڅ څه وروستي نه دي.</p>
<p style="text-align: justify;">امریکا تر اوسه په رسمي ډول په دې اړه څه نه دي ویلي، خو د راپورونو له مخې، د ایران د بهرنیو چارو وزارت ویاند اسماعیل بقایي پرون (دوشنبه) د خپلې اونیزې خبري ناستې پر مهال په ترکیه کې د احتمالي مذاکراتو په اړه ویلي وو چې تهران د ډیپلوماتیک بهیر د پر مخ بیولو اړوند عمومي او جزیي مسایل ارزوي.</p>
<p style="text-align: justify;">هغه ویلي وو: «هغه څه چې روښانه دي دا دي چې موږ په دغه پړاو کې د ډیپلوماتیک بهیر د پر مخ بیولو اړوند د ځینو عمومي او جزیي موضوعاتو په ارزونه بوخت یو. دا طبیعي ده چې د سیمې هېوادونو خپلې ښې هڅې زیاتې کړې دي. موږ د پرېکړې په پړاو کې یو او د موضوع ټول اړخونه په پام کې لرو، البته زموږ لپاره وخت مهم دی.»</p>
