کراچۍ پوهنتون کې ځانمرګي برید درې چینایي استادان وژلي

کابل (پژواک، ۶ غویی ۱۴۰۱) : د پاکستان د ستر ښار کراچۍ پوهنتون کې د یوه ځانمرګي برید له امله ددرېیو چینایي استادانو په ګډون څلور کسان وژل شوي دي.

پاکستانیو رسنیو د ځایي امنیتي مسوولینو په حواله خبر ورکړی چې د ښځینه ځانمرګې بریدګرې لخوا دا برید نن د غویي په ۶مه، تر غرمې وروسته په شاوخوا بجو شوی و.

سرچینو زیاته کړې، یوه ځانمرګې بریدګرې چې د کراچۍ پوهنتون په دروازه کې ولاړه وه، پر هغه موټر برید کړې چې پکې د یاد پوهنتون چینایي استادان سپاره وو.

د کراچۍ د پولیسو یو تن مشر مقدس حیدر رسنیو ته ویلي چې په دې برید کې ددرېیو چینایي استادانو په ګډون څلور تنه وژل شوي، چې دوه یې ښځې دي.

هغه سرچینې زیاته کړې چې وژل شوي چینایان د کراچۍ پوهنتون د چینایي ژبې د انسټیټیوټ استادان وو.

بلخوا په ټولنیزو شبکو کې خپره شوې ویډیو کې ښکاري، چې یوه پیغله ښځه هلته ولاړه ده او کله چې د چینایي استادانو موټر راځي، دا ځان ته چاودنه ورکوي.