بدخشان کې د تندر لوېدو پېښه کې درې کسان مړه شوي

فیض‌اباد (پژواک، ۲۰ غبرګولی ۱۴۰۱): ځایي چارواکي وایي چې په بدخشان ولایت کې د تندر لوېدو له امله د دوو وروڼو په ګډون درې کسان مړه شوي دي.

د دغه ولایت له پېښو سره د مبارزې رییس مولوي محمد اکرم اکبري د غبرګولي په ۲۰مه پژواک خبري اژانس ته وویل چې دا پېښه نن غرمه مهال د تشکان ولسوالۍ په ملنګان سیمه کې شوې ده.

هغه زیاته کړه، یادو کسانو د تیز باران له امله تر یوه څپرې لاندې ناست وو چې ناڅاپه پرې تندر لوېدلی او درې واړه مړه شوي دي.

اکبري وایي چې په مړه شوو کې دوه وروڼه شامل دي.

دا په داسې حال کې ده چې تېره اونۍ هم په کشم ولسوالۍ کې د تندر لوېدو پېښه کې دوه وروڼه مړه شوي وو.

Views: 35