اټلانټا (پژواک، ۲۲ زمری ۱۴۰۱): د خیبر پښتونخوا په دوو سیمو کې پر پاکستاني ځواکونو چاودنه او یوه برید کې شپږو سرتېرو ته مرګژوبله اوښتې ده.
ځایي رسنیو د زمري په ۲۲مه خبر ورکړی چې د خېبر پښتونخوا په بره دير سیمه کې د ډیورنډ پولې ته نږدې چاودنه شوې چې له امله یې دوه سرتېري وژل شوي او یو بل ټپي شوی دی.
د دیر د پولیسو مشر جهانزېب خان وایي چې په نصرت دره کې پوځيان چینې ته د اوبو راوړلو لپاره تللي وو چې په لاره کې پرې چاودنه شوې ده.
دا چاودنه په داسې حال کې شوې چې په دې وروستیو کې یادې سیمې ته د طالبانو د ورتګ په اړه راپورونه ورکړل شوي دي.
د یو بل خبر له مخې، د سوېلي وزيرستان د برمل تحصيل په اعظم ورسک سيمه کې نامعلومو وسلهوالو د پوليسو پر پوستې برید کړی چې له امله یې یو پولیس وژل شوی او دوه نور ټپیان شوي دي.
د دغو بریدونو مسوولیت تر اوسه چا پر غاړه نه دی اخیستی.
Views: 144
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن