اټلانټا (پژواک، ۱۵ مرغومی ۱۴۰۱): امریکا وایي، د افغانستان سرپرست حکومت له خوا په نادولتي موسسو کې د ښځو پر کار لګول شوو محدودیتونو اغېزې څېړې او ډېر ژر به په دې اړه د سپینې ماڼۍ د نوې پالیسۍ ځیني موارد اعلان شي.
د امریکا غږ د خبر له مخې، د متحدو ایالتونو د بهرنیو چارو وزیر انتوني بلینکن د مرغومي په ۱۴مه ناوخته په واشنګټن کې وویل، امریکا د افغانستان په ګډون ټولو هغو ځایونو کې له ښځو څخه ملاتړ ته ژمنه ده چې د دوی حقونه پکې ګواښل کېږي.
هغه زیاته کړه: «له بدهمرغه په افغانستان کې پر ښځو محدودیتونه تل د زیاتېدو او ناوړه کېدو په حال کې دي.»
دا په داسې حال کې ده چې امریکایي چارواکو څو ځله د افغانستان له سرپرست حکومته غوښتي چې په نادولتي موسسو کې له کار څخه د ښځو منع کولو او په دولتي او غیردولتي پوهنتونونو کې د دوی د زدهکړو مخنیوي په اړه خپله پرېکړه بدله کړي او تل د دغه کار د پایلو په اړه یې خبرداری ورکړی دی.
بلخوا د راپورونو له مخې، د امریکا د بهرنیو چارو وزارت وایي، واشنګټن د داسې «مشخصو عواقبو پر څېړنې بوخت دی چې کېدای شي پر طالبانو وضع شي»، خو په دې اړه یې جزیات وړاندې نه کړل.
د بهرنیو چارو وزارت ویاند نډ پرایس په واشنګټن کې خبریالانو ته وویل: «متحده ایالتونه په ټوله نړۍ کې له خپل همنظره شریکانو سره کار کوي څو د مناسبو عواقبو مجموعه طرحه کړي چې له طالبانو څخه زموږ محکومیتونه او د افغانستان د خلکو ملاتړ پکې وي.»
پرایس زیاته کړه، د امریکا سیاسي ځواب به محتاطانه وي، په داسې شکل چې د افغانستان د خلکو بشري وضعیت تر دې زیات له خطر سره مخ نه کړي.
له شپږم ټولګي پورته د نجونو ښوونځیو بندول، د ښځو پر مخ د ښوونیزو مرکزونو، حمامونو، تفریحي پارکونو تړل، له محرم پرته د سفر مخنیوی، په پوهنتونونو کې د زدهکړو او په نادولتي سازمانونو کې د مېرمنو د کار ځنډول هغه عمده محدودیتونه دي چې سرپرست حکومت د ۲۰۲۱ کال په اګست میاشت کې پر افغانستان له واکمنېدو وروسته، پر افغان مېرمنو وضع کړې دي.
د سرپرست حکومت ویاند ذبیحالله مجاهد ویلي چې په موسسو کې د ښځو پر کار د بندیز پرېکړه د ښځو د «عزت او عفت ساتنې» په موخه صادر شوې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن