کابل (پژواک، ۱۷ سلواغه ۱۴۰۱): عدلیې وزارت وایي، د ځمکې د غصب مخنیوي او د غصب شوو ځمکو د استرداد کمېسیون تر اوسه ۲.۷ میلیون جریب ځمکه بررسي کړې، ۳.۶ میلیون تر بررسۍ لاندې ده او له غصب شوې ځمکې یې ۲.۳ میلیون امارتي تثبیت کړې ده.
یاد کمېسیون د روان کال د لړم میاشتې په اتمه په کار پیل کړی؛ دغه کمېسیون د عدلیې، کرنې، ښارجوړولو، کار او ټولنیزو چارو وزارتونو او لويې څارنوالۍ له استازو جوړ دی.
د عدلیې وزارت ویاند عبدالحمید جهادیار نن پژواک خبري اژانس ته وویل چې یاد کمېسیون تر اوسه په ټول هېواد کې ۲.۷ میلیون جریب ځمکه بررسي کړې، ۳.۶ میلیون جریب یې تر بررسۍ لاندې ده او تر اوسه یې ۲.۳ میلیون جریب امارتي تثبیت کړې ده.
هغه وویل، تر اوسه ۲۷۴.۵ زره جریب ځمکه استرداد شوې او پاتې نوره امارتي تثبیت شوې ځمکه به ژر استرداد او د غاصبینو له منګولو وژغورل شي.
دی وایي چې په ټولو ولایتونو کې د دغه کمېسیون چارې په ډېرې چټکۍ روانې دي.
Visits: 139
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن