میمنه (پژواک، ۲۴ سلواغه ۱۴۰۱): د فاریاب یو شمېر اوسېدونکي د مخابراتي شبکو د انټرنیټي خدمتونو له ټيټ کیفیته شکایت لري او له حکومت او اترا ادارې څخه د دغو شبکو د خدمتونو د کنټرول غوښتنه کوي.
له بلې خوا، د یاد ولایت د مخابراتو ریاست وايي چې د مخابراتي شبکو ټيټ کیفیت خدمتونو ستونزې ته به رسېدنه وشي.
د فاریاب پوهنتون استاد محمداشرف شریفي وايي، له پنځو کلونو راهیسې د افغان بېسیم له انټرنیټه کار اخلي، خو په وینا یې چې هیڅکله د دغې شبکې له خدمتونو راضي نه دی.
شریفي وویل: «د افغان بېسیم شبکې 4G انټرنټ دروغ دي او په ورته مهال په میاشت کې لږ تر لږه يوه اوونۍ خراب او د استفادې وړ نه وي.»
هغه د مخابراتو او معلوماتي ټکنالوژۍ له وزارت او اترا ادارې څخه غوښتنه کوي چې د مخابراتي شبکو د تقلب او کمکارۍ مخه ونیسي او اجازه ورنکړي چې له بېوزلو خلکو بېمورده پیسې واخلي.
يو شمېر سيمهييز خبريالان هم په دغه ولايت کې د مخابراتي شبکو انټرنیټي خدمتونه کمزوري ګڼي او ادعا کوي چې له همدې امله يې د اطلاع رسونې چارې له ستونزو سره مخ شوې دي.
په یاد ولايت کې د سيمهييزو خبريالانو له ډلې علاوالدين ایرکین پژواک اژانس ته وويل: «افغان بېسيم او نورې شبکې له خلکو ډېرې پيسې اخلي، خو خدمات يې د ګټې اخيستنې وړ نه دي.»
هغه زیاته کړه چې د مخابراتو وزارت او اترا ادارې مسوولین باید د مخابرتي شبکو خدمات کنټرول کړي.
د ازاد بیګ رسولي په نوم یوه بل خبریال هم وویل: «پخوا مې د روشن له انټرنټه ګټه اخیستله، پایله یې ورنکړه او اتصالاتو ته مې بدل کړ، خو د دغه شبکې فعالیت هم کمزوری و او وروسته مې د بیسیم فورجي انټرنټ فعال کړ، متاسفانه چې دا هم د ګټې اخیستنې وړ نه دی.»
بلپلو، په فاریاب کې د افغان بېسیم مخابرتي شبکې نمایندهګي وایي چې په راتلونکو ورځو کې به د فورجي انټرنټ ستونزې حل شي.
په فاریاب کې د افغان بېسیم ولایتي استازي انجنیر امینالله انتظار، پژواک ته وویل: «د افغان بېسیم مخابراتي شرکت په دوامدار ډول هڅه کوي څو لا ښه خدمات وړاندې کړي؛ خو د اورښتونو، د تقویتي تجهیزاتو کموالي او نورو تخنیکي عواملو له امله د دغې شبکې په ځینو انتنونونو کې ستونزې رامنځته شوې چې دغو ستونزو او د خلکو شکایتونو ته به رسېدنه وشي.»
هغه زیاته کړه چې په فورجي انټرنټ کې شته ستونزې به تر راتلونکو دوو اونیو پورې حل شي.
د فاریاب د مخابراتو رییس مفتي هدایتالله، د خلکو ستونزې تاییدوي او وایي چې د انټرنټي خدمتونو شبکې کمزورې دي.
هدایتالله زیاته کړه، په افغانستان کې په ځانګړې توګه فاریاب کې د ټولو شبکو مخابراتي کیفیت ټیټ دی، د فاریاب د مخابراتو ریاست هڅه کوي چې د مخابراتي شبکو مسوولین دې ته اړ کړي چې د خدماتو کیفیت لوړ کړي.
Visits: 18
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن