پلخمري (پژواک، ۱ وری ۱۴۰۲): د بغلان په مرکز پلخمري کې «د ازادۍ پسرلی» تر نوم لاندې د لسګونو پهلوانانو تر منځ د غېږنیونې سیالۍ وشوې.
د نوي کال او پسرلي په مناسبت د غېږنیونې دغه سیالۍ پرون مازدیګر پیل شوې او تر ناوخته یې دوام وکړ چې د دغه ولایت د مرکز او څورلسو ولسوالیو لسګونو پهلوانانو په کې ګډون کړی وو.
د بغلان د اطلاعاتو او فرهنګ رییس مولوي مصطفی هاشمي د دغو سیالیو په مراسمو کې وویل، د غېږنیونې سیالۍ په دغه ولایت کې د مېشتو قومونو د یووالي سمبول ګڼل کېږي چې دا ځل په ارامه او ډاډمنه فضا کې ترسره کېږي.
هغه زیاته کړه، ورزش او لوبې د روغتیا تر څنګ د قومونو تر منځ د اچول شوو تفرقو د له منځه وړلو او د هغوی تر منځ د یووالي راوستلو ښه وسیله ده چې اسلامي امارت یې د ودې لپاره کار کوي.
د دغه ولایت د ورزش او بدني روزنې امر قاري محمدامیر امیري وویل، بغلان کې ورزش وده کړې او دا له تېرې یوې میاشتې راهیسې د غېږنیونې درېیمه سیالي ده چې په دغه ولایت کې کېږي.
د قاري عبدالله په نوم یوه پهلوان چې دغو سیالیو کې یې ګډون کړی و، پژواک ته وویل خوښ دی چې د پسرلي او نوي کال په مناسبت ځوانانو ته د سالمې بوختیا په موخه دا سیالۍ جوړې شوې دي.
خو هغه له مسوولینو ځینې غوښتنې هم لري او وايي چې په دغه ولایت کې د غېږنیونې لپاره مناسب میدان نشته، دغه راز لوبغاړي د دغې لوبې لپاره مناسبې جامې نه لري چې باید پام ورته وشي.
د یادونې ده چې میاشت مخکې د کوروش فدراسیون له خوا په دغه ولایت کې د ۱۲ ولایتونو تر منځ د غېږنیونې رسمي سیالۍ هم جوړې شوې وې.
Visits: 13
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن