[restrict paid="true"]
<p style="text-align: justify;">کابل (پژواک، ۱۱ وری ۱۴۰۲): د اطلاعاتو او فرهنګ وزارت له لوري د مطالعې فرهنګ د ودې په موخه د بیهقي کتاب خپرولو ریاست داځل د کابل په بله سیمه کې د قرانکریم او کتاب د ۳ ورځنی نندارتون پرانستلو.</p>
<p style="text-align: justify;">د باختر اژانس د خبر له مخې، د یاد ریاست د نندارتونونو جوړولو مسوول غوث الدین ددې نندارتون د پرانستلو پر مهال وویل، چې په یاد نندارتون کې د بیهقي کتاب خپرولو ریاست سربېره شاوخوا ۲۱ خصوصي ناشرانو هم ګډون کړی او څه د پاسه ۲۵ زره ټوکه کتابونه پکې نندارې ته ایښودل شوي دي.</p>
<p style="text-align: justify;">نوموړي له کابل ښاریانو څخه هم غوښتنه وکړه، چې له یاد نندارتون څخه لیدنه وکړي او خپل د خوښې وړ کتابونه ترلاسه کړي.</p>
<p style="text-align: justify;">یو شمېر خصوصي ناشرانود اطلاعاتو او کلتور وزارت د دغه اقدام ستاینه وکړه، او ويې ویل چې د ورته نندارتونونو جوړول له کتاب لوستنې سره د ځوانانو د علاقې او کتاب خرڅونې لپاره د بازار موندنې په برخه کې مرسته کوي.</p>
<p style="text-align: justify;">یو شمېر ځوانانو، چې له دغه نندارتون څخه يې لیدنه کوله هم خوښي څرګنده کړه، چې دا ډول نندارتونونه تر یوه چتر لاندې او په اسانه توګه د هر ډول کتابونو مطالعې او تر لاسه کولو ته لاره هواروي.</p>
<p style="text-align: justify;">د یادونې وړ ده، چې د بیهقي کتاب خپرولو ریاست تر دې څو ورځې وړاندې هم د پلازمېنې کابل ښار په ده افغانانو سیمه کې هم ورته درې ورځنی نندارتون جوړ کړی وو، چې د خلکو تود هرکلی يې هم له ځان سره درلود.</p>
[/restrict]
