د نورستان پوهنتون محصلین: لیلیه نه لرو او بدل اعاشه پر وخت نه راکول کېږي

پارون (پژواک، ۱۹ غبرګولی ۱۴۰۲): د نورستان د لوړو زده‌کړو موسسې یو شمېر محصلین د لیلیې له نشتوالي او پر وخت د بدل اعاشې نه ورکړې له امله شکایت لري او له مسوولینو یې د حل غوښتنه کوي.

د نورستان پوهنتون د ښوونې او روزنې پوهنځي د پښتو ادبيا

تو څانګې د درېيم ټولګي زده‌کړيال فضل‌الله سلطان‌زى وايي، دوى په لومړي ځل له شلو ډېر کسان دغې څانګې ته بريالي شوي وو، خو له نیمايي ډېرو یې د اقتصادي ستونزو له امله پوهنتون پرېښود او زده‌کړې ترې پاتې شوې .

د هغه په خبره، دوى ته په روان سمستر کې تر اوسه بدل اعاشه نه ده ورکړل شوې چې له امله یې له سختو اقتصادي ستونزو سره مخامخ دي.

د یاد پوهنځي د دري ادبياتو څانګې د دویم کال محصل عبدالقهار وايي، د ليليې ترڅنګ د تدريسي خونو او لوازمو کمښت هم د دوى د د زده‌کړو پر بهیر منفي اغېز کړی او له مجبورۍ په بازار کې په کرايه خونو کې اوسېږي .

هغه زیاتوي: «چوکۍ کمې دي، د تدريس مناسب ټولګي نشته، بديل اعاشه پر وخت نه راکول کېږي او د مطالعې له پاره کتابتون او کمپيوټرلب هم نشته چې ورڅخه استفاده وکړو.»

په ورته مهال، د نورستان د لوړو زده‌کړو موسسې ریيس روح‌الله نجم هم د یادو ستونزو د تاید ترڅنګ،  سږ کال د شرعياتو پوهنځي منظورېدل او د علمي او اکاډميک دریېو آمريتونو فعالېدل د دغه بنسټ لاسته‌راوړنې بولي .

هغه زياتوي، د نورستان د لوړو زده‌کړو موسسې لپاره يې تر اوسه ځمکه نه ده موندلې چې ودانۍ پکې جوړه کړي او دوى دا مهال د تدریسي چارو لپاره د دارالمعلمين له ودانۍ څخه ګټه اخلي.

د نجم په خبره، زده‌کړيالانو ته د بدل اعاشې ورکړه د بودجې نه توشېح له امله ځنډلې وه خو اوس دغه ستونزه هواره شوې او په روانه مياشت کې به ورته ورکړل شي.

نوموړي د کمپيوټرلب او کتابتون نشتون هم د زده‌کړيالانو پر وړاندې یوه ستونزه ګڼي خو وايي چې د حل لپاره یې هڅې کوي.

بلخوا د نورستان د والي وياند سيف‌الدين لټون وايي، د دغه ولايت مسوولينو تل هڅه کړې چې د پوهنتون لپاره ځمکه ومومي، خو تر اوسه بريالي شوي نه دي.

د لټون په وینا، د نورستان ولايت غرنۍ جغرافيې ته په کتو هوارې ځمکې لږې پيدا کېږي، نو ځکه تر اوسه نه دي توانېدلي چې د پوهنتون ودانۍ جوړه کړي.

هغه زیاته کړه، د ځمکې رانيولو برخه کې د ولايتي ادارې هڅې دوام لري څو په یوه مناسب ځاى کې پوهنتون ته ځمکه واخيستل شي.

د معلوماتو له مخې، د نورستان د لوړو زده‌کړو موسسه دا مهال د ښوونې روزنې او شرعياتو دوه پوهنځي لري چې نږدې ۴۰۰ زده‌کړيالان پکې پر زده کړو بوخت دي. دغه موسسه تر اوسه خپله ځمکه او ودانۍ نه لري.

Views: 214