ایبک (پژواک، ۲۴ غبرګولی ۱۴۰۲): د سمنګان سیمهییز مسوولین وايي، د دغه ولایت په درهصوف بالا ولسوالۍ کې د ډبرو سکرو په یوه کان کې د ګاز خپرېدو له امله دوه کانکیندونکي مړه او لسګونه نور مسموم شوي دي.
د سمنګان د درهصوف بالا ولسوال محمد نسیم خیبر وویل، یاده پېښه تېره شپه د دغې ولسوالۍ د «مرک دهانهتور» کان په يوه استخراجي دهلېز کې رامنځته شوې ده.
هغه زياته کړه چې په یاده پېښه کې دوه کانکیندونکي مړه شوي دي.
خو د سمنګان د ولايتي روغتون امر ډاکټر سيدعثمان حميدي وويل، د کاربن مونو اکساید ګاز خپرېدو له امله دوه کانکیندونکي مړه او ٣٥ نور مسموم شوي دي.
حميدي د مسموم شوو کسانو روغتيايي وضعیت د ډاډ وړ وباله، خو په غيرتخنيکي ډول د کانونو استخراج د دغه ډول مرګونو پېښو د رامنځته کېدو اصلي لامل بولي.
هغه زياته کړه چې مسموم شوي کسان روغتيايي مرکزونو ته لېږدول شوي او تر درملنې لاندې دي.
Views: 34
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن