کندهار (پژواک، ۱۴ چنګاښ ۱۴۰۲): د کندهار یو شمېر سوداګر وايي، سږ کال په دغه ولایت کې د انګورو حاصلات ښه دي او بهر ته د صادرولو لپاره یې له حکومته د هوايي دهلېز غوښتنه کوي.
په دغه ولایت کې د تازه مېوې اتحادیې رييس حاجي ناني اغا پژواک خبري اژانس ته وویل: «اوس تازه پاکستان ته ۴۰ ټنه انګور صادر شوي او په وینا يې، که هوایي دهلېز وای د کندهار انګور به په نورو هېوادونو کې هم په ښه بیه پلورل شوي وای.»
د هغه په خبره، دا چې اوس مهال د هوا له لارې د صادراتو امکانات نشته نو دوی د ځمکې له لارې هڅه کوي چې ډېر انګور صادر کړي.
نوموړي وویل: «موږ د تېر کال په شان چې خپل انار مو روسیې ته صادر کړل، نو سږ کال هم کوښښ کوو، کومو هېوادونو ته چې د ځمکې له لارې امکان ولري انګور صادروو خو اوس زموږ مارکېټ یوازې پاکستان دی.»
د انګورو یو سوداګر سعدالله وایي، سږ کال د انګورو حاصلات ښه دي او تمه لري چې په بهر کې هم په ښه بیه وپلورل شي.
هغه زیاته کړه چې اوسمهال د کندهار انګور یوازې پاکستان او هند کې بازار لري او له حکومته يې وغوښتل چې د تازه مېوو په تېره بیا انګورو صادرولو لپاره دې هوايي دهلېز پرانیزي.
سعدالله زیاته کړه: «سږ کال انګور ډېر ښه دي، اوبه ډېرې او مرضونه یې نه دي کړي، نو موږ امید لرو چې په پاکستان او هند کې هم په ښه بیه خرڅ شي.»
بڼوال هم وایي، سږ کال د انګورو کیفیت ښه دی او که چېرې ښه مارکېټ ورته پیدا شي، د سوداګرو ترڅنګ دوی ته هم ډېره ګټه رسېږي.
د کندهار د ژېړۍ ولسوالۍ په سنځري سیمه کې د انګورو په یوه بڼ کې په کار بوخت شریفالله وایي، له کلونو راهیسې د انګورو شکولو په برخه کې کار کوي.
دی وايي، کله چې د انګورو حاصلات او بیه ښه وي نو بیا دوی ته هم د کار په بدل کې ډېرې پیسې ورکول کېږي.
د کندهار د سوداګرۍ خونې مسوولین هم وایي، تمه ده چې سږ د انګورو په صادراتو کې زیاتوالی راشي.
د سوداګرۍ خونې مرستیال انجنیر عبدالباقي بینا پژواک ته وویل، اوس مهال د صادراتو په مخ کې هیڅ خنډ نشته او انګور په یخچالي موټرو کې په ښه ډول صادریږي.
د هغه په خبره، که چېرې کومه ستونزه رامنځته نه شي، سږ کال به تر تېر کال ډېر انګور هند او پاکستان ته صادر شي.
هغه د هوايي دهلېز په اړه د سوداګرو غوښتنې په ځواب کې وویل، اوس حکومت د هوايي دهلېز پرانیستلو لپاره کافي امکانات نه لري.
د سوداګرۍ خونې مرستیال وویل، په تېر ۱۴۰۱ کال کې له کندهاره د ۸ میلیون او ۹۹ زره ۴۶۰ ډالرو په ارزښت ۱۵۲۸۰ ټنه انګور بهر ته صادر شوي وو.
غړيYou need to subscribe to view the full article. Please login or register a new account.
