شبرغان (پژواک، ۱۳ وږی ۱۴۰۲): جوزجان کې سیمهییزې سرچینې وايي چې د یوه روزنیز پروګرام په ترڅ کې د دغه ولایت د کډوالو چارو ریاست کارکوونکو ته د داخلي بېځایه شوو د حقونو، ناقانونه کډوالۍ او منفي پایلو په اړه معلومات ورکړل شوي دي.
دغه روزنیز پروګرام دوه ورځې مخکې د افغانستان د پارامونټ پرمختیايي موسسې (APWDO) له لوري جوړ شوی و چې نن پای ته ورسېد.
جوزجان ولايت کې د دغه دفتر مسوول محمدحليم دقیق پژواک خبري اژانس ته وويل، دغه روزنيز پروګرام کې چې د یاد ولايت د کډوالو او بېرته راستنېدونکو چارو رياست د کارکوونکو ظرفيت لوړولو په موخه جوړ شوى و، د دغه رياست ۱۰ کار کوونکو پکې ګډون درلود.
د هغه په خبره، په یاد پروګرام کې د داخلي بېځايه شوو د حقونو سربېره د غيرقانوني کډوالۍ او د منفي پايلو په اړه یې هم ګډونوالو ته معلومات ورکړل شول.
په همدې حال کې، د جوزجان ولايت د کډوالو او بېرته راستنېدونکو چارو ریيس ملا امانالله طلحه د دغه پروګرام له جوړيدو په خوښي څرګندولو سره وايي چې په دغه پروګرام کې ګډونوالو ته د ډېرو مهمو مسايلو په اړه معلومات ورکړل شول.
هغه د بېځایه شوو د حقونو او د غیرقانوني کډوالۍ په څېر مسایلو ته اشاره وکړه او ویې ویل، په دې ورکشاپ کې پر دغو مسایلو خبرې وشوې، چې ډېر مهم وو.
هغه زیاته کړه: «هغه معلومات چې په درې ورځني پروګرام کې مو زده کړل ډېر ګټور او ارزښتناک وو، موږ له همکارو بنسټونو غواړو څو راتلونکي کې هم د کارمندانو د ظرفیت لوړونې لپاره دا ډول پروګرامونه جوړ کړي.»
د یادې موسسې مسوولین وايي چې دغه روزنیز پروګرام دوام لري او په پام کې ده چې نور ځوانان هم تر پوښښ لاندې راولي څو د غیرقانوني کډوالۍ له خطرونو خبر شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن