کابل (پژواک، ۲۶ لېندۍ ۱۴۰۲): د کاناډا د کډوالو چارو وزارت وايي، په پاکستان او د منځنۍ اسیا هېوادونو کې یې د افغان کډوالو لاسنیوي په موخه ۲۱ میلیون امریکايي ډالر د کډوالۍ نړۍوال سازمان ته سپارلې دي.
د کاناډا د کډوالۍ وزیر مارک مېلر پرون په ژنیو کې د «کډوالو نړۍوال فورم» ناسته کې ویلي چې هېواد یې په منځنۍ اسیا او پاکستان کې د افغان کډوالو لاسنیوي په موخه ۲۱ میلیونه امریکایي ډالر مرسته کړې ده.
هغه زیاته کړې چې دا مرسته یې د کډوالۍ نړۍوال سازمان ته سپارلې او کوربه هېوادونو ته د افغان کډوالو د اړتیاوو پوره کولو په موخه ورکول کېږي.
د سرچینې څرګندونو له مخې، دغه هېواد په ناامنو شرایطو کې د ښځو، مذهبي او توکمیزو لږکیو، د بشري حقونو مدافعانو په ګډون د ځپلشوو خوندیتوب او بیا مېشتېدنې ته ژمن دی.
د کاناډا د کډوالۍ او تابعیت ادارې معلوماتو له مخې، د ۲۰۲۱ کال له اګسټه راهیسې ۴۳ زره او ۸۳۵ افغان کډوال یې یاد هېواد ته لېږدولي دي.
Views: 63
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن