<p style="text-align: justify;">[restrict paid="true"]</p>
<p style="text-align: justify;">هرات (پژواک، ۲۳ مرغومی ۱۴۰۲): افغان ملي سوداګر ميرويس عزيزي اعلان وکړ چې په نږدې راتلونکي کې به په هېواد کې د اوسپنې پټلۍ پراختیا او انرژۍ برخو کې ۱۰ میليارده امريکايي ډالر پانګونه کوي.</p>
<p style="text-align: justify;">عزيزي دغه اعلان نن (جمعه، د مرغومي ۲۲مه) په هرات کې زلزلهځپلو ته د جوړ شوي ښارګوټي پرانیستې مراسمو کې وکړې.</p>
<p style="text-align: justify;">د شاوخوا ۲۲۰ کورونو دغه ښارګوټی چې ښوونځی، جومات او پارک هم لري، د عزیزي بنسټ له لوري د ۲۰۰ میلیون افغانیو په لګښت د هرات په زندهجان ولسوالۍ کې جوړ شوی دی.</p>
<p style="text-align: justify;">میرویس عزیزي وویل چې په نږدې راتلونکي کې به په هېواد کې د اوسپنې پټلۍ پراختیا او انرژۍ برخو کې لس میلیارد ډالر پانګونه کوي خو نوموړي په دې اړه نور جزئیات ورنه کړل.</p>
<p style="text-align: justify;">هغه زیاته کړه چې په هېواد کې د پانګونې فرصتونه برابر شوي او د دې ډول سترو پروژو په پیلولو سره زرګونو کسانو ته د کار زمینه برابرېږي.</p>
<p style="text-align: justify;">د نوموړي په خبره، له دې پانګونې يې موخه د افغانستان اقتصادي پراختیا او د کار زمينې ايجادول دي.</p>
<p style="text-align: justify;">ورته وخت کې د هرات والي د ياد سوداګر د دغه بې مخينې اقدام ستاينه وکړه او پر نړۍوالو مرستندویه بنسټونو يې غږ وکړ چې د نمايشي مرستو پر ځای د افغان ولس د بسياينې او لاسنیوي په موخه د عمل ميدان ته را ودانګي.</p>
<p style="text-align: justify;">هېره دې نه وي چې ميرويس عزيزي په داسې حال کې په هېواد کې د لس میليارده ډالرو پانګونې خبر ورکړی چې له دې مخکې اسلامي امارت چارواکو په وار وار له ملي او نړۍوالو پانګوالو غوښتنه کړې وه چې په افغانستان کې پانګونه وکړي.</p>
<p style="text-align: justify;">[/restrict]</p>
