پاناما کې د کډوالو یوې کښتۍ ډوبېدو له امله ‎پنځه کسان مړه شوي

کابل (پژواک، ۲۸ سلواغه ۱۴۰۲): د پاناما هېواد د کارایب په سواحلو کې د یوې کښتۍ ډوبېدو پېښه کې چې ۲۷ کسان په‌کې سپاره وو او ډېر یې افغانان وو، لږ تر لږه پنځه کسان مړه شوي دي.

فاکس نیوز د پاناما امنیتي چارواکو له قوله راپور ورکړی چې یاده کښتۍ د چهارشنبه په ورځ (د سلواغې ۲۵مه) ډوبه شوې ده.

د راپور له مخې، د یادې کښتۍ ډوبېدو له امله چې ۲۷ سپرلي یې درلودل او ډېری یې افغانان وو، د دوو مېرمنو او یوه ماشوم په ګډون پنځه کسان مړه شوي دي.

د پاناما امنیتي چارواکو ویلي، د یادې کښتۍ یو سپرلی لا هم ورک دی او د پیدا کولو هڅې یې روانې دي.

د یادونې ده، پاناما کې د کارائیب سواحلو لاره د ناقانونه کډوالۍ له لارو څخه یوه ده چې په دې وروستیو کې امریکا ته له دې لارې د کډوالۍ هڅې ډېرې شوې دي.

له دې مخکې د پاناما د امنیت وزارت ویلي وو چې د کال په دغه وخت کې خراب اقلیمي شرایط د دغه ډول پېښو لامل کېږي.