پل علم (پژواک، ۲۶ کب ۱۴۰۲): د لوګر د اطلاعاتو او فرهنګ ریاست چارواکي وایي چې رسنیو او خبریالانو ته د اطلاعاتو ورکولو په موخه د دغه ولایت ټولو ملکي او نظامي ادارو ته ویاندویان ټاکل شوي دي.
د لوګر د اطلاعاتو او فرهنګ رییس رفیعالله صمیم یوې خبري غونډې ته وویل چې د پخوا په پرتله په دغه ولایت کې اطلاعاتو ته د خبریالانو او رسنیو لاسرسی اسانه شوی او خبریالان کولای شي چې له ټولو ملکي او نظامي ادارو پر خپل وخت معلومات ترلاسه کړي.
صمیم زیاته کړه، ولایتي ادارې معلوماتو ته د ښه لاسرسي لپاره ملکي او نظامي ادارو ته ویاندویان ټاکلي دي چې ورسره د پخوا په پرتله د خبریالانو او رسنیو ستونزې کمې شوې دي.
نوموړي همدارنګه زیاته کړه، لوګر اطلاعاتو او فرهنګ ریاست هڅه کوي چې د ولایت په کچه د ملي او محلي رسنیو خبریالانو او دولتي ویاندویانو ته د ظرفیت لوړونې پروګرامونه هم جوړ کړي.
بل لورته په لوګر کې یوه خبریال سردار ولي بهیج پژواک ته وویل، د پخوا په پرتله معلوماتو ته لاس رسی اسانه شوی دی.
خو دی وايي، اطلاعاتو او فرهنګ ریاست ته پکار ده چې د خپلو ملکي او نظامي ادارو ویاندویان داسې وروزي څو اسانۍ سره خبریالانو ته معلومات ورکړي.
![صمیم: اطلاعاتو ته د لاسرسي لپاره د لوګر ټولو ملکي او نظامي ادارو ته ویاندویان ټاکل شوي](https://pajhwok.com/wp-content/uploads/2024/03/423903980_398869402999519_4344057432202047232_n.jpg)
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن