کابل (پژواک، د غویي لومړۍ نېټه ۱۴۰۳): د قطر بهرنیو چارو وزارت د امنیت شورا له خوا په ملګرو ملتونو کې د فلسطین بشپړ غړیتوب پرېکړهلیک پر نه تصویبېدو خواشیني څرګنده کړې او دغه کار یې د سیمې د سولې هڅو ناکامي بللې ده.
دغه وزارت نن (شنبه، د غویي لومړۍ نېټه) په یوه خبرپاڼه کې په ملګرو ملتونو کې د فلسطین بشپړ غړیتوب پرېکړهلیک په تصویب کې د امنیت شورا ناکامۍ په اړه خواشیني څرګنده کړه.
خبرپاڼه کې زیاته شوې: «د یاد پرېکړهلیک طرحې د تصویب برخه کې د امنیت شورا ماتې یو ځل بیا د نړۍوال امنیت او سولې د تینګښت په چوکاټ، په ځانګړې توګه د غزې پر وړاندې د جګړې په سیوري کې د دې شورا د رول او مسوولیت ناتواني څرګنده کړه.»
د قطر بهرنیو چارو وزارت د امنیت شورا دغه ناکامي په سیمه کې د سولې ټینګښت د هڅو ماته ګڼلې ده.
قطر له نړۍوالې ټولنې غوښتي چې ژر تر ژره په منځنۍ اسیا کې د نښتو او کړکېچونو کمولو لپاره بېړنی اقدام وکړي.
د قطر بهرنیو چارو وزیر یادې څرګندونې په داسې حال کې کړې چې متحده ایالتونو امنیت شورا کې د فلسیطن بشپړ غړیتوب پرېکړهلیک طرحه ویټو کړه چې د نړۍ د ځینو هېوادونو له غبرګون سره مخ شوه.
امنیت شورا د ملګروملتون تر ادارې لاندې دویمه لویه مرجع ده چې نړۍ کې د امنیت او سولې مسوولیت لري.
