ګردېز (پژواک، ۱۰ غويی ۱۴۰۳): د پکتیا حکومتي مسوولین وايي چې د ګردېز- ډنډپټان ولسوالۍ عمومي لار د غرښوېیدنې له امله د ترافیکو پرمخ تړل شوې ده.
د پکتیا د ټولګټو ریاست د یوې خبرپاڼې په خپرولو سره ویلي چې نن سهار په احمدخېلو ولسوالۍ کې د غرښوېیدنې له امله د ګردېز- ډنډپټان عمومي لار د ترافیکو پرمخ تړل شوې ده.
سرچینه وايي چې ماشینري او پرسونل سیمې ته استول شوي څو لار هر څه ژر بېرته د ترافیکو پر مخ خلاصه کړي.
د یادونې ده چې د پکتیا د شپږو ولسوالیو خلک پر یاده لار تګ راتګ کوي او ترڅنګ یې له پاکستانه سوداګریز او ترانزیټي توکي هم پر دغه لار پلازمېنې کابل او نورو ولایتونو ته لېږدول کېږي.
