فیروزکوه (پژواک، ۹ غبرګولی ۱۴۰۳): د وروستیو سېلابونو له امله د غور جام منار زیانمنېدو په اړه د پژواک راپور له خپرېدو وروسته د غور ځایي مسوولینو وايي چې د اطلاعاتو او فرهنګ وزارت د تاریخي ابدو ساتنې او ترمیم د رییس په مشرۍ یو پلاوی د یاد منار د وضعیت ارزونې په موخه غور ته ورغلی دی.
د پژواک د یوه راپور له مخې، د غور د اطلاعاتو او فرهنګ ریاست د غبرګولي په درېیمه ویلي چې وروستیو سېلابونو د مالي او ځاني زیانونو اړولو ترڅنګ د جام منار هم زیانمن کړی دی.
د غور د اطلاعاتو او فرهنګ ریاست د اطلاعاتو امر مولوي محمدحماس وایي چې د اطلاعاتو او فرهنګ وزارت د تاریخي ابدو د ساتنې او ترمیم رییس انجنیر محمدحسیب نسیمي د یوه پلاوي په مشرۍ تېره ورځ دغه ولایت ته رارسېدلی دی.
نوموړي زیاته کړه: «دغه پلاوی د دغه تاریخي منار د وضعیت ارزونې، تحلیل او راتلونکي کې د هغه د لا خوندیتوب، دغهراز د منار شاوخوا سیمه کې د وروستیو سېلابونو رسوباتو پاکولو په موخه د غور مرکز فیروزکوه ته راغلی دی.»
هغه وویل، ټاکل شوې راغلی پلاوی د جام منار سیمې ته ولاړ شي او د هغه اروزنه او د تحکیماتو په اړه به یې اقدام وکړي.
د یادونې ده، د سېلابونو له راتلو مخکې د دغه ولایت اوسېدونکو د دغه منار ځينو برخو ته د زیان اوښتو په اړه اندېښنه ښودلې وه او د هغه د ترمیم غوښتنه یې کړې وه.
Views: 11
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن