چاریکار (پژواک، ۲۰ چنګاښ ۱۴۰۳): پروان کې دوه کسان له یو غلا شوي موټر، یو کس د موټرو په پېر او پلور کې د جعلکارۍ او د یوې ښځې په ګډون څلور نور کسان له یوه کوره د سرو زرو او نغدو پیسو د غلا په تور نیول شوي دي.
د پروان امنیې قوماندانۍ په خبرپاڼه کې راغلي چې امنیتي ځواکونو د دغه ولایت په جبلالسراج ولسوالۍ کې دوه کسان هغه مهال نیولي چې غوښتل یې له کاپیسا غلا کړی یو موټر له دې لارې ولېږدوي.
سرچینه زیاتوي، پولیسو د دغه ولایت د مرکز اړوند څلورمې امنیتي حوزې سیمه کې یو کس د موټرو په پېر او پلور کې د جعلکارۍ او څلور نور کسان د غلا په تور نیولی دي.
خبرپاڼه کې راغلي، یاد څلور کسان چې یوه مېرمن په کې شامله ده، تورن دي چې د سیمې له یوه کوره یې ۱۴۵۰۰۰ افغانۍ، یو د سرو زرو سېټ او یوه اندازه نور قیمتي توکي غلا کړي دي.
د خبرپاڼې له مخې، نیول شوي کسان له جنایي جرمونو سره د مبارزې مدیریت له لوري تر لومړنیو څېړنو لاندې دي او وروسته به اړوند ارګان ته وسپارل شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن