میمنه (پژواک،۱۳ زمری ۱۴۰۳): فاریاب کې ځايي سرچینې وايي چې د فاریاب – جوزجان پر لویه لار د دغه ولایت د خانچارباغ ولسوالۍ په مربوطاتو کې د یوې ترافیکي پېښې له امله ۹ کسان مړه او درې نور ټپیان شوي دي.
د فاریاب د خانچارباغ ولسوالۍ د ترافیکي پېښو د څېړلو مسوول دوستمحمد دوست پژواک خبري اژانس ته وویل چې د فاریاب – جوزجان پر لویه لار د دغه ولایت په خانچارباغ ولسوالۍ کې یو سراچه موټر له یوه کرولا موټر سره ټکر کړی دی.
هغه زیاته کړه چې په دې پېښه کې ۹ کسان مړه او درې نور ټپیان شوي دي.
مسوولین وايي، د پېښې مړي او ټپیان د فاریاب ولایت د اندخوی ولسوالۍ روغتون ته لېږدول شوي دي.
د فاریاب د اندخوی ولسوالۍ د روغتون مسوول ډاکټر سنجر عمري وویل چې نن له غرمې وروسته درې بجې دغه روغتون ته د شپږو نارینهوو او درېیو ښځو په کډون ۹ مړي او د یوې ښځې او دو نارینهوو په ګډون درې ټپیان وروړل شوي دي.
هغه زیاته کړه چې د پېښې ډېری مړي او ټپیان د فاریاب ولایت د قیصار ولسوالۍ اوسېدونکي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن