کابل (پژواک، ۲۴ وږی ۱۴۰۳): د افغانستان د صنعت او سوداګرۍ وزارت وایي، په کابل کې د قزاقستان سفیر د دغه وزارت له سرپرست سره په لیدنه کې د خپل ماموریت د پای ته رسېدو خبر ورکړ.
د صنعت او سوداګرۍ وزارت په خبرپاڼه کې راغلي چې د دغه وزارت سرپرست نورالدین عزیزي په کابل کې د قزاقستان له سفیر علیم خان یسین ګیلدیف سره ولیدل.
سرچینې لیکلي چې په دغه لیدنه کې ګیلدیف په افغانستان کې د خپلې دندې له پای ته رسېدو څخه د سوداګرۍ سرپرست وزیر ته خبر ورکړ او له هغه څخه یې د افغانستان او منځنۍ اسیا هېوادونو تر منځ د سوداګرۍ د مناسبې فضا رامنځته کولو له امله مننه وکړه.
یاد وزارت لیکلي چې عزیزي په افغانستان کې د ګیلدیف د کار او ماموریت ستاینه وکړه او نوموړی یې د دواړو هېوادو تر منځ د سوداګریزو اړیکو په ټېنګښت کې یو موثر او اغېزناک شخصیت وباله.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن