کابل (پژواک، ۲۵ وږی ۱۴۰۳): د افغانستان د اسلامي امارت د رییسالوزراء سیاسي مرستیال مولوي عبدالکبیر د نبي کریم (ص) د زوکړې ورځې په مناسبت جوړه شوې غونډه کې له خلکو سره د مجاهدینو پر ښه چلند ټینګار کړی او له مسوولینو یې غوښتي څو په خپلو کړنو کې نبوي اخلاق او اسلامي احکام په پام کې ولري.
نن (یکشنبه) د ۱۴۴۶ هـ.ق کال د ربیعالاول میاشتې ۱۲مه د حضرت محمد (ص) د پیدایښت نېکمرغه ورځ ده، دغه مهمه ورځ هر کال د مسلمانانو له لوري په ټوله نړۍ او افغانستان کې د قرانکریم په ختمونو، خیراتونو او صدقو ورکولو سره لمانځل کېږي.
د اسلام علمای کرام په دې ورځ د حضرت محمد (ص) د سیرت او ژوند په اړه معلومات ورکوي او خلک د دغه پیغمبر له سنتو پیروي کولو ته رابولي.
د افغانستان د اسلامي امارت د رییسالوزرا سیاسي مرستیال مولوي عبدالکبیر په کابل کې د «جامعه شمس علوم روحانیه» په مدرسه کې د «النبی(ص) د سیرت» په اړه جوړو شوو مراسمو کې، د نبي کریم (ص) د سیرت او اخلاقو په اړه خبرې وکړې او د مسلمانانو په ژوند کې یې د اسلامي اخلاقو پر علمي کولو ټینګار وکړ.
هغه زیاته کړه: «د ملت د قربانیو په پایله کې له نېکهمرغه د هېواد په ټول جغرافیه کې اسلامي نظام حاکم دی او خلکو ته د اسلامي نظام د ارزښتونو په رڼا کې خدمت وړاندې کیږي.»
هغه له خلکو سره د اسلامي امارت د مسوولینو او مجاهدینو پر ښه چلند ټینګار وکړ او زیاته یې کړه: «مسوولین دې په خپلو کړنو کې د نبوي اخلاقو او اسلامي احکامو ته پاملرنه وکړي.»
بلخوا، د افغانستان د تېر حکومت اجرائیه رییس ډاکتر عبدالله عبدالله هم پر خپله ایکسپاڼه د بیانیې په خپرولو د نړۍ ټولو مسلمانانو په ځانګړې توګه د هیواد خلکو د حضرت محمد (ص) د زوړکړې د نېکمرغه ورځې مبارکي ویلې ده.
هغه وايي، د اسلام پیغمبر د بشر د تاریخ په یوه داسې پړاو کې په پیغمبرۍ مشرف شو چې جهالت، تیارې او د الهي لارښونو له نور څخه لرېوالې څپې خپرې شوې وې. د اسلام د پیغمبر (ص) د وحی ترلاسه کولو او د اسلامي دین او تمدن په بنسټ ایښودلو سره په نړۍ او بشري ټولنه کې یو ستر بدلون راوست.
هغه زیاته کړه، د اسلام پیغمبر د مکې او مدینې په دوو پړاوونو کې د اسلامي امت او ټولنې په جوړولو سره پر عدالت، برابرۍ او اخلاقو د ولاړ ژوند بنسټ کېښود چې د مسلمانانو لپاره د وخت او تاریخ په اوږدو کې د ښه کېدو او پرمختګ لپاره د څراغ او الګو په توګه عمل کوي.د
هغه وویل: «د نبي کریم (ص) د زوکړې په نېکمرغه ورځ له لوی خدای (ج) نه د ټولو مسلمانانو لپاره یووالی، همغږي، همدردي او د اسلامي هېوادونو لپاره سوله، امنیت، ټیکاو او پرمختګ غواړو او له الله (ج) نه دعا غواړو څو موږ ته د اسلام د پیغمبر په پیروۍ کولو او د هغه د خلاصون ورکونکو لارښوونو په عملي کولو موږ ته توفیق راکړي.»
حضرت محمد (ص) د ۵۷۰ هـ.ق کال د ربیعالاول په ۱۲مه نړۍ ته سترګې پرانیستې، په څلوېښت کلنۍ کې پیغمبري مبعوث شو او له ۲۳ کاله پیغمبرۍ وروسته یې په ۶۳ کلنۍ له دې نړۍ سترګې پټې کړې.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن