<p style="text-align: justify;">کابل (پژواک، ۲۵ وږی ۱۴۰۳): د افغانستان د اسلامي امارت د رییسالوزراء سیاسي مرستیال مولوي عبدالکبیر د نبي کریم (ص) د زوکړې ورځې په مناسبت جوړه شوې غونډه کې له خلکو سره د مجاهدینو پر ښه چلند ټینګار کړی او له مسوولینو یې غوښتي څو په خپلو کړنو کې نبوي اخلاق او اسلامي احکام په پام کې ولري.</p>
<p style="text-align: justify;">نن (یکشنبه) د ۱۴۴۶ هـ.ق کال د ربیعالاول میاشتې ۱۲مه د حضرت محمد (ص) د پیدایښت نېکمرغه ورځ ده، دغه مهمه ورځ هر کال د مسلمانانو له لوري په ټوله نړۍ او افغانستان کې د قرانکریم په ختمونو، خیراتونو او صدقو ورکولو سره لمانځل کېږي.</p>
<p style="text-align: justify;">د اسلام علمای کرام په دې ورځ د حضرت محمد (ص) د سیرت او ژوند په اړه معلومات ورکوي او خلک د دغه پیغمبر له سنتو پیروي کولو ته رابولي.</p>
<p style="text-align: justify;">د افغانستان د اسلامي امارت د رییسالوزرا سیاسي مرستیال مولوي عبدالکبیر په کابل کې د «جامعه شمس علوم روحانیه» په مدرسه کې د «النبی(ص) د سیرت» په اړه جوړو شوو <strong><a href="https://x.com/ARG_1880/status/1834888516905656756">مراسمو</a> </strong>کې، د نبي کریم (ص) د سیرت او اخلاقو په اړه خبرې وکړې او د مسلمانانو په ژوند کې یې د اسلامي اخلاقو پر علمي کولو ټینګار وکړ.</p>
<p style="text-align: justify;">هغه زیاته کړه: «د ملت د قربانیو په پایله کې له نېکهمرغه د هېواد په ټول جغرافیه کې اسلامي نظام حاکم دی او خلکو ته د اسلامي نظام د ارزښتونو په رڼا کې خدمت وړاندې کیږي.»</p>
<p style="text-align: justify;">هغه له خلکو سره د اسلامي امارت د مسوولینو او مجاهدینو پر ښه چلند ټینګار وکړ او زیاته یې کړه: «مسوولین دې په خپلو کړنو کې د نبوي اخلاقو او اسلامي احکامو ته پاملرنه وکړي.»</p>
<p style="text-align: justify;">بلخوا، د افغانستان د تېر حکومت اجرائیه رییس ډاکتر عبدالله عبدالله هم پر خپله ایکسپاڼه د <a href="https://x.com/DrabdullahCE/status/1835192006454263924">بیانیې</a> په خپرولو د نړۍ ټولو مسلمانانو په ځانګړې توګه د هیواد خلکو د حضرت محمد (ص) د زوړکړې د نېکمرغه ورځې مبارکي ویلې ده.</p>
<p style="text-align: justify;">هغه وايي، د اسلام پیغمبر د بشر د تاریخ په یوه داسې پړاو کې په پیغمبرۍ مشرف شو چې جهالت، تیارې او د الهي لارښونو له نور څخه لرېوالې څپې خپرې شوې وې. د اسلام د پیغمبر (ص) د وحی ترلاسه کولو او د اسلامي دین او تمدن په بنسټ ایښودلو سره په نړۍ او بشري ټولنه کې یو ستر بدلون راوست.</p>
<p style="text-align: justify;">هغه زیاته کړه، د اسلام پیغمبر د مکې او مدینې په دوو پړاوونو کې د اسلامي امت او ټولنې په جوړولو سره پر عدالت، برابرۍ او اخلاقو د ولاړ ژوند بنسټ کېښود چې د مسلمانانو لپاره د وخت او تاریخ په اوږدو کې د ښه کېدو او پرمختګ لپاره د څراغ او الګو په توګه عمل کوي.د</p>
<p style="text-align: justify;">هغه وویل: «د نبي کریم (ص) د زوکړې په نېکمرغه ورځ له لوی خدای (ج) نه د ټولو مسلمانانو لپاره یووالی، همغږي، همدردي او د اسلامي هېوادونو لپاره سوله، امنیت، ټیکاو او پرمختګ غواړو او له الله (ج) نه دعا غواړو څو موږ ته د اسلام د پیغمبر په پیروۍ کولو او د هغه د خلاصون ورکونکو لارښوونو په عملي کولو موږ ته توفیق راکړي.»</p>
<p style="text-align: justify;">حضرت محمد (ص) د ۵۷۰ هـ.ق کال د ربیعالاول په ۱۲مه نړۍ ته سترګې پرانیستې، په څلوېښت کلنۍ کې پیغمبري مبعوث شو او له ۲۳ کاله پیغمبرۍ وروسته یې په ۶۳ کلنۍ له دې نړۍ سترګې پټې کړې.</p>
