<p style="text-align: justify;">کابل (پژواک، ۱۹ تله ۱۴۰۳): د «رېنیووا» په نوم د یوې جاپاني کمپنۍ رییس د افغانستان برېښنا شرکت له عمومي اجرائیوي رییس سره په لیدنه کې ویلي چې غواړي افغانستان کې د ۴۰ مېګاواټه لمریزې برېښنا تولید په موخه پانګونه وکړي.</p>
<p style="text-align: justify;">د افغانستان برېښنا شرکت تېره ورځ پر خپله <a href="https://x.com/DABS_Official/status/1843996336041148649">اېکس</a> پاڼه لیکلي چې د یاد شرکت عمومي اجرائیوي رییس ډاکټر عبدالباري عمر د رېنیووا (RENOVA) کمپنۍ له رییس جنک واحد سره د ۴۰ مېګاواټه لمریزې برېښنا د پانګونې په اړه خبرې وکړې.</p>
<p style="text-align: justify;">د یادې کمپنۍ رییس وویل چې غواړي افغانستان کې د ۴۰ مېګاواټه لمریزې برېښنا تولید په موخه پانګونه وکړي.</p>
<p style="text-align: justify;">هغه زیاته کړه چې غواړي په راتلونکي کې افغانستان کې د برېښنا تولید سرچینو څخه د استفادې په موخه خپلې طرحې د افغانستان برېښنا شرکت ته وړاندې او د لمریزې برېښنا تولید کچه تر ۴۷۰ مېګاواټه پورې لوړه کړي.</p>
<p style="text-align: justify;">د معلوماتو له مخې، رېنیووا جاپاني کمپنۍ ده چې د لمریزې او بادي برېښنا د تولید برخو کې فعالیت لري.</p>
<p style="text-align: justify;">د یادونې ده چې وړمه ورځ د کابل په سروبي ولسوالۍ کې د ۲۲،۷۵ مېګاواټه لمریزې برېښنا پروژې چارې پیل شوې.</p>
<p style="text-align: justify;">د اقتصادي معاونیت د معلوماتو له مخې، د ۷۷ ترکي او زولرستان داخلي شرکتونو په دې پروژه کې ۱۸ میلیون ډالر پانګونه کوي او په بشپړېدو به یې د کابل صنعتي پارکونو او عامو هېوادوالو ته برېښنا ورکړل شي.</p>
