پر غزه د اسرائیل بریدونو کې ۱۴۳ کسانو ژوند له لاسه ورکړی

کابل (پژواک، ۹ لړم ۱۴۰۳): الجزیرې راپور ورکړی چې تېره ورځ په غزه کې د اسرائیلو په بریدونو کې ۱۴۳ تنه فلسطینیانو ژوند بایللی دی.

د الجزیرې د راپور له مخې، د غزې روغتیایي سرچینو ویلي چې له یادو ۱۴۳ فلسطینیانو یوازې ۱۳۲ تنه یې د غزې په شمال کې دي.

سرچینه زیاتوي، اسرائیلو دغه بريدونه د غزې په شمال «بیت‌لاهیا» ښارګوټي کې د بې‌ځایه شوو فلسطینیانو پر استوګنیزو کورونو کړي دي.

د راپورونو له مخې، تر دې مهاله په غزه کې د اسرائیلو په بریدونو کې څه باندې ۴۳ زره فلسطینیانو ژوند له لاسه ورکړی او له ۱۰۱ زره او ۲۲۳ ډېر نور ټپيان شوي دي.