<p style="text-align: justify;">کابل (پژواک، ۱۶ لړم ۱۴۰۳): د جمهوريغوښتونکو ګوند نوماند ډونالډ ټرمپ وکولای شول چې په ولسمشریزو ټاکنو کې کاملا هريس ته په ماتې ورکولو د دویم ځل لپاره د امریکا متحده ایالتونو ولسمشر شي.</p>
<p style="text-align: justify;"><strong><a href="https://www.reuters.com/world/us-presidential-election-day-live-2024-11-05/">رویټرز</a></strong> اژانس خبر ورکړی چې ټرمپ د ۲۷۹ الکټرال رایو په ترلاسه کولو د امریکا اووه څلوېښتم ولسمشر شو.</p>
<p style="text-align: justify;">دا په داسې حال کې ده چې د یادو ټاکنو بله نومانده کاملا هریس یوازې ۲۲۴ الکټرال رایې ترلاسه کړې او له ټرمپ څخه په ډېر واټن شا ته پاتې ده.</p>
<p style="text-align: justify;">ټرمپ وکولای شول خپلې ډیموکراټې سیالې کاملا هریس ته ماته ورکړي او د دویم ځل لپاره سپینې ماڼۍ ته وروګرځي.</p>
<p style="text-align: justify;">هغه په څه باندې ۱۳۰ کلونو کې لومړنی ولسمشر دی چې بیا سپینې ماڼۍ ته ورګرځي.</p>
<p style="text-align: justify;">ټرمپ له دې مخکې د ۲۰۱۶ او ۲۰۲۰ کلونو ترمنځ هم د امریکا ولسمشر و.</p>
<p style="text-align: justify;">د نړۍ د ډېرو هېوادونو لکه د برېټانیا، فرانسې او اوکراین مشرانو په ولسمشریزو ټاکنو کې د ټرمپ د بریا مبارکي ورکړې ده.</p>
