<p style="text-align: justify;">کابل (پژواک، ۲ لیندۍ ۱۴۰۳): د ترکمنستان او چین چارواکو په یوه دوه اړخیزه ناسته کې ټینګار کړی چې دواړه هېوادونه به د افغانستان د اقتصادي وضعیت د ښه والي لپاره خپلو هر اړخیزو همکاریو ته دوام ورکړي.</p>
<p style="text-align: justify;">د ترکمنستان د بهرنیو چارو وزارت د یوې <a href="https://www.mfa.gov.tm/en/news/4900">خبرپاڼ</a>ې په خپرولو سره ویلي، د دغه هېواد د بهرنیو چارو وزارت مرستیال سردار محمددورديایف د افغانستان لپاره د چین له ځانګړي استازي یو شیاویونګ سره لیدلي.</p>
<p style="text-align: justify;">د خبرپاڼې له قوله، دواړو لورو په دغه لیدنه کې د افغانستان د ثبات د ټینګښت او د دغه هېواد د ټولنیز او اقتصادي وضعیت د ښه والي لپاره د څو اړخیزو نړۍوالو پلټفارمونو د رول پر ارزښت ټینګار وکړ.</p>
<p style="text-align: justify;">په خبرپاڼه کې راغلي چې یاده ناسته کې د افغانستان د ګاونډیو هېوادو د بهرنیو چارو وزیرانو د پنځمې ناستې د جوړېدو په اړه هم خبرې اترې شوې دي.</p>
<p style="text-align: justify;">خبرپاڼې زیاته کړې: «هغوی یو ځل بیا ټینګا وکړ چې ترکمنستان او چین به د دوستۍ او ښه ګاونډیتوب اصولو له مخې د افغانستان له اقتصادي بیارغونې هر اړخیز ملاتړ ته دوام ورکړي.»</p>
<p style="text-align: justify;">په یاده ناسته کې په افغانستان کې د ثبات په رامنځته کېدو او د دغه هېواد د ټولنیز او اقتصادي وضعیت په پراختیا کې د نړۍوالې ټولنې پر رول هم بحث وشو.</p>
<p style="text-align: justify;">یاده ناسته داسې مهال ترسره کېږي چې له دې مخکې د افغانستان لپاره د چین ځانګړي استازي پاکستان ته په سفر کې د هغه هېواد د بهرنیو چارو وزارت له مرستیالې امنه بلوچ سره لیدلي و.</p>
<p style="text-align: justify;">د پاکستان د بهرنیو چارو وزارت ویلي و چې دواړو لورو په یاده لیدنه کې له افغانستان سره د اړیکو په اړه خبرې کړي او د یوه سولهییز او باثباته افغانستان لپاره یي د ګاونډیو هېوادونو پر حیاتي رول ټينګار وکړ.</p>
<p style="text-align: justify;"></p>
