<p style="text-align: justify;">کابل (پژواک، ۳ لیندۍ ۱۴۰۳): د ملګرو ملتونو د بشري مرستو همغږيکوونکي دفتر (اوچا) اعلان کړی چې په ۲۰۲۴ زېږدیز کال کې په ټوله نړۍ کې ۲۸۱ مرستندوی کارکوونکي وژل شوي دي.</p>
<p style="text-align: justify;">یاد سازمان په یوه <strong><a href="https://news.un.org/en/story/2024/11/1157371#:~:text=2024%20deadliest%20year%20ever%20for%20aid%20workers%2C%20UN%20humanitarian%20office%20reports,-22%20November%202024&text=The%20death%20toll%20of%20humanitarian,milestone%20has%20surpassed%20previous%20records.">راپور</a> </strong>کې، روان زیږدیز کال د مرستندویه کارکوونکو لپاره تر ټولو مرګونی کال بللی او د هغوی د ژوند پر خوندیتوب یې ټینګار کړی دی.</p>
<p style="text-align: justify;">اوچا زیاته کړې چې د بشري کارکوونکو پر وړاندې ګواښونه له «افغانستان، غزې، اوکراین، سوېلي سوډان او یمن» څخه راپور شوي دي.</p>
<p style="text-align: justify;">بشري چارو کې د ملګرو ملتونو د سرمنشي نوي مرستیال او د دغه سازمان د بېړنیو مرستو همغږيکوونکي وویل: «د بشردوستانه کارکوونکو وژنه ډېره شوې ده. د هغوی زړهورتیا او انسانیت د مرمیو او بمونو په وسیله په نښه کېږي.»</p>
<p style="text-align: justify;">یاد سازمان ټينګار کړی چې دولتونو او په جګړه کې ښکېلې خواوې باید له مرستندویو کسانو ساتنه وکړي، نړۍوال قوانین مراعات کړي او د مرسته رسوونکو د وژنو عاملین عدالت ته وسپاري.</p>
<p style="text-align: justify;">د غزې جګړه چې تېر کال د اکټوبر په اوومه پیل شوه، د مرستندوی کارکوونکو مرګژوبلې د پام وړ ډېرېدو یو له اصلي لاملونو ګڼل کېږي او د اوچا د شمېرو له مخې، تېر زېږدیز کال د حماس او اسرائیل د جګړې له پیله راهیسې تر اوسه ۳۳۳ مرستندوی کارکوونکي وژل شوي دي.</p>
<p style="text-align: justify;">اوچا ویلي، له یادو ستونزو سره سره بشري سازمانونه اوس هم د حیاتي مرستو رسولو ته دوام ورکوي او تېر کال یې نږدې ۱۴۴ میلیون اړمنو کسانو ته مرستې رسولې دي.</p>
<p style="text-align: justify;"></p>
