ایران د ۵۰۰ افغان بندیانو نوملړ د هویت د تایید په موخه ا.ا ته سپارلی

کابل (پژواک، ۱۲ لېندۍ ۱۴۰۳): د ایران د عدلیې وزارت د بشر حقونو او نړۍوالو چارو مرستیال ویلي چې تهران د ۵۰۰ افغان بندیانو نوملړ د هویت د تایید او افغانستان ته د هغوی د لېږد په موخه ا.ا ته سپارلی دی.

د تېرې زمري میاشتې په ۲۴ مه د ایران د عدلیې وزارت یو پلاوی د زندانیانو پر مسایلو د خبرو په موخه کابل ته راغلی و او تر راتګ مخکې یې ویلي و چې په راتلونکو دوو میاشتو کې به زر افغان بندیان د افغانستان سرپرست حکومت ته وسپاري.

د ایران د عدلیې وزارت د بشر حقونو او نړۍ‌والو چارو مرستیال عسکر جلالیان ایسنا خبري اژانس ته ویلي، چې تهران د افغان بندیانو د لومړۍ مرحلې د انتقال لپاره ۵۰۰ کسیز نوملړ اسلامي امارت ته را استولی دی.

هغه ویلي، د دغه نوملړ له استولو یې موخه د افغان بندیانو د هویت تایید او پېژندنه ده.

ده ویلي، کله چې یاد نوملړ تایید شي نو یاد بندیان به په لومړۍ مرحله کې افغان حکومت ته وسپارل شي.

جلالیان د جزییاتو له ورکولو پرته ویلي، په ایران کې له ۸ زرو زیات بهرنيان بندیان دي چې ډېری یې افغانان دي.

د راپور له مخې،  د یادو زندانیانو ډېر یې د نشه‌یي توکو اړوند جرمونو محکوم شوي دي.