<p style="text-align: justify;">لښکرګاه (پژواک، ۳ مرغومی ۱۴۰۳): هلمند کې یو شمېر صنعتکاران چې په خپلو کورونو کې لاسي صنایع تولیدوي، شکایت کوي چې دغه ولایت کې د لاسي صنایعو د پلور لپاره هیڅ ځانګړی مارکېټ نشته او امله یې د دوی توکي مناسب بازار نه لري.</p>
<p style="text-align: justify;">د هلمند د مرکز لښکرګاه ښار د مختار سیمې یوه اوسېدونکي عمران وویل، دوی په خپل کور کې د ماشومانو لپاره خولۍ، خامک غاړې، ښځینه جامي او یو شمېر نور توکې جوړوي، خو د ځانګړي مارکېټ نشتوالي له امله اړ دي په عام بازار کې یې په ټيټه بیه وپلوري.</p>
<p style="text-align: justify;">هغه وویل: «اوس مونږ په کور کې خامک غاړې، څادرونه، ښځینه جامې، د ماشومانو د سر خولۍ او یو شمېر نور توکي جوړوو خو د ځانګړي مارکېټ نشتون له امله اړ یو په عام بازار کې یې په دوکاندارانو د هغوی د خوښې په بیه وپلورو.»</p>
<p style="text-align: justify;">دغه راز، د لښکرګاه ښار د سیمټي سیمې اوسېدونکي نویداحمد وویل، د کورنۍ غړي یې په کور کې د لاسي صنایعو پر تولید بوخت دي، خو جوړ شوي توکي د مارکېټ نشتون له امله په کور کې پراته دي او هیڅ بازار نه لري.</p>
<p style="text-align: justify;">نوموړي وویل: «دا اوس مې خامکي غاړې بازار ته را وړې خو دوکاندارانو رانه په ډېره ټیټه وغوښتې، خرڅې مې نهکړې، تاوان مې کېده، اړ شوم بېرته یې کور ته یوسم.»</p>
<p style="text-align: justify;">نوموړی غوښتنه کوي چې حکومت او مرستندویه ادارې دې د دوی تولیداتو ته ځانګړی مارکېټ جوړ کړي څو په دې سره به هلمند کې د لاسي صنایعو کاروبار پراخ شي او خلکو اقتصاد به هم ورسره وده وکړي.</p>
<p style="text-align: justify;">ورته مهال، هلمند کې د اقتصادي چارو یو تن کارپوه اسدالله اندیال پژواک خبري اژانس ته وویل، لاسي صنایعو لپاره د ځانګړي مارکېټ جوړول او بازارموندنه ډېره اړینه ده؛ ځکه دغه ولایت کې په کورناستې مېرمنې د لاسي صنایعو د تولید برخه کې ښه مهارتونه لري او که حکومت یا مرستندویه ادارې ورته پاملرنه وکړي، دغه توکي به په سیمهییزه کچه هم ښه بازار پیدا کړي.</p>
<p style="text-align: justify;">هغه وویل: «حکومت ته پهکار ده چې د لاسي صنایعو د تولیداتو ملاتړ وکړي، ترڅنګ یې مارکېټ ورته جوړ کړي او د بازارموندنې برخه کې یې کوټلي ګامونه واخلي چې د خلکو لاسي صنایع تر نړۍوالو مارکېټونه پوري ورسېږي.»</p>
<p style="text-align: justify;">اندیال له حکومته غوښتنه وکړه چې دغو صنعتکارانو ته دې د کارونو د پراختیا په موخه د کوچنیو پورونو د ورکړې پروسه هم پیل کړي.</p>
<p style="text-align: justify;">خو د هلمند د صنعت او سوداګرۍ ریاست مرستیال مولوي فضلمحمد فضلي پژواک خبري اژانس ته وویل، هڅه کوي په دغه ولایت کې د هرې برخې صنعت ته وده ورکړي او لاسي صنایعو ته هم مناسب بازار پیدا کړي.</p>
<p style="text-align: justify;">هغه زیاته کړه: «په هلمند کې د لاسي صنایع لپاره زمونږ ریاست پلان لري چې په ښار کې ورته ځانګړی بازار جوړ کړي څو خلک خپل لاسي صنایع هلته په مناسبه بیه وپلوري.»</p>
<p style="text-align: justify;">نوموړي زیاته کړه، د یاد مارکېټ جوړېدل هغه وخت ممکن دي چې د صنعت او سوداګرۍ وزارت ورته ځانګړی طرزالعمل ورکړي.</p>
