خوستښار (پژواک، ۲ کب ۱۴۰۳): خوست کې يو شمېر معلولين وايي چې د موقتي مرستو پر ځای دې د دايمي لاسنيوي په موخه د حرفوي او مسلکي زدهکړو زمينه ورته برابره شي.
د شمېرو له مخې، د خوست د شهیدانو او معلولینو چارو ریاست سره څه باندې شپږ زره معلولين ثبت او راجستر دي.
د دغو معلولينو له ډلې يو هم محمدنور دی چې د خوست ولايت مرکز اړوند د وزيانو کلي اوسېدونکی دی.
هغه که څه هم پر دواړو پښو معلول دی او د ګرځېدو لپاره له ويلچره استفاده کوي، خو بيا يې هم د سياسي علومو برخه کې د ليسانس تر کچې زدهکړې کړې دي.
نوموړي پژواک خبري اژانس ته وويل، هرې دولتي او غيردولتي ادارې ته يې چې د دندې وړاندیز کړی، د معلوليت له امله یې د رد ځواب ترلاسه کړی دی.
هغه زیاته کړه: «په ۱۳۹۹ لمريز کال د حقوقو له پوهنځي فارغ شوی يم، ولې تر اوسه چې هرې ادارې ته لاړ شوی يم او هر ځای ته چې لاړ شوی یم، ما ته يې زمينه نه ده برابره کړې چې زه په کوم بست باندې کار وکړم.»
محمدنور پژواک ته وويل، کومې لنډمهالې مرستې چې دا مهال د دولتي او يا غيردولتي ادارو له خوا له معلولينو سره کېږي، دا د هغوی د کورنيو اړتياوې نه شي پوره کولای.
هغه وايي، که اړوند ادارې په رښتيني معنا له معلولينو سره د مرستې او همکارۍ هوډ لري، نو هغوی دې په حرفوي او مسلکي زدهکړو سمبال کړي، څو د تل لپاره بل ته له سوال کولو خلاص شي.
هغه زياتوي: «په افغانستان کې معلولينو ته مثبت کار نه دی شوی، دا يوه بورۍ اوړه او يا وريجې د دوی درد نه شي دوا کولای؛ تعليميافته معلولين بايد په دولتي ادارو کې جذب شي او بېسواده معلولينو ته دې د بېلابېلو حرفو زدهکړې ورکړل شي، څو د هغو له لارې خپلو کورنيو ته حلاله نفقه پيدا کړي.»
دغه راز، د دغه ولايت يو بل معلول ميراجان هم چې پر دواړو پښو معلول دی، پژواک ته وويل چې د اقتصادي ستونزو له امله يې اولادونه له زدهکړو بېبرخې دي او دی هم هيڅ کار روزګار نه شي کولای.
هغه زیاته کړه، که کوم کسب يې زده وای، اوس به په دغه حالت کې نه وای او يو ښه ژوند به يې درلود.
هغه وايي: «معلولين هر وخت خپه وي، په تشويش کې وي، بس ژوند دی تېروو به يې، د بل محتاج يو، موږ غوښتنه لرو چې د داسې کار زمينه راته برابره شي چې له لارې یې خپلې اقتصادي ستونزې حل کړو.»
د خوست یو شمېر نورو معلولینو هم ورته څرګندونې وکړې او د حرفوي او مسلکي زدهکړو زمینې برابرېدو غوښتنه یې وکړه.
ورته مهال، ځایي چارواکي بيا ډاډ ورکوي چې د معلولینو ستونزو ته د رسېدنې برخه کې یې ډېر کار کړی دی.
د خوست د شهيدانو او معلولينو چارو رييس مولوي عبدالرحيم احسان پژواک اژانس ته وويل، دوی وخت ناوخت مرکز کابل ته د سهم پر اساس معلولين د حرفوي او مسلکي زدهکړو ته معرفي کوي.
هغه زياته کړه: «مرکز موږ ته خپله سهميه راکوي، هغې ته کسان معرفي کوو او هلته حرفوي زدهکړې کوي، نو موږ غوښتنه کړې ده چې خوست ولايت ته دغه پروژه رانقل شي او موږ کسان ورته برابر کړو؛ ځکه دلته معلولين بېخي ډېر دي.»
نوموړي دغه راز په خپلو خبرو کې وويل چې له دوی سره څه باندې شپږ زره معلولین ثبت دي چې هر يوه ته يې پر خپل وخت مياشتني حقوق ورکول کېږي.
د یادونې ده، د خوست ترڅنګ په نورو ولایتونو کې هم معلولین له بېلابېلو ستونزو سره مخ دي او غوښتنه کوي چې رسېدنه ورته وشي.
GET IN TOUCH
NEWSLETTER
SUGGEST A STORY
PAJHWOK MOBILE APP