د ښرنې یو شمېر اوسېدونکي د ښار پراختيا لپاره د ماسټر پلان د تطبیق غوښتنه کوي

ښرنه (پژواک، ۸ کب ۱۴۰۳) د پکتیکا مرکز ښرنې یو شمېر اوسېدونکي وایي چې ښار کوچنی دی، ډېری سړکونه يې خام دي او د ژوند کولو لپاره لومړنۍ اړتياوې په کې نه دي برابرې شوي.

هغوی د ښار د کوچينوالي او سړکونو او کوڅو خاموالي ترڅنګ د پاکو اوبو سيسټم نشتون، د داخلي ترانسپوټ او دولتي برېښنا نشتوالی هغه څه بولي چې دوی يې له ستونزو سره مخ کړي دي.

په دې اړه د مرکز ښرنې یوه اوسېدونکي محمد اکبر پژواک ته وویل چې د ښاروالۍ عوايد کم دي او نه شي کولی ښاريانو ته اړين خدمتونه وړاندې کړي.

هغه دغه راز وويل چې د ښار پراختيا او ماسټر پلان تطبيق لپاره دې حکومت د ښرنې ښاروالۍ ته ځانګړې بودجه منظوره کړي.

هغه وويل که ماسټر پلان تطبیق او ځينې اسانتياوې رامنځته شي ډېر کسان به دغه ولایت کې پانګونې ته زړه ښه کړي.

نوموړي زیاته کړه: «زموږ ښار خو يوازې دا دوه کوڅې دی، له ښاروالي سره مو غونډې کړې چې زموږ ښار باید هرې خوا ته پنځه کیلومتره پراخ او ماسټر پلان کې شامل شي، تجارتي او رهایشي ځمکې په کې معلومې شي، دلته خلک ډېر لېواله دې چې مارکېټونه او رهایشي کورونه جوړ کړي خو فقط اوس ستونزه دا ده چې پلان تطبیق شي او نقشه واچول شي.»

دغه راز، د ښرنې يو بل اوسېدونکي نورمحمد هم وويل چې ښار کوچنی دی او اړينې اسانتياوې په کې نشته دي.

هغه وويل، د ښار اړوند زياتره ځمکې د يو واضح ماسټر پلان د نشتون له امله د خلکو ترمنځ دعوه‌يي او لانجمنې پرتې دي.

ده په پلازمېنې کابل کې له حکومتي مشرانو غوښتنه وکړه چې د ښرنې ښار د ځمکو تصفيې لپاره دې ماسټر پلان جوړ او تطبيق کړي.

نورمحمد زیاته کړه: «د دې ښار بنیاد د داوود خان په وخت کې اېښودل شوی، یوه لویه ستونزه په کې دا ده چې ځمکو تصفیه یې نه ده شوې، خلک ډېر په مشکل کې دي، نو ټولې دخیلې ادارې په ګډه باید داسې پلان جوړ کړي چې خلکو ته سهولتونه رامنځته شي او تجار دلته سرمایه‌ګذاري ته زړه ښه کړي، یعنې ماسټر پلان باید دومره پراخ وي چې ډېرو کلونو لپاره وي او تطبيق شي چې ښار پراخه شي.»

د دغه ولایت یو شمېر نورو اوسېدونکو هم ورته څرګندونې وکړې او د یادې ستونزې د حل غوښتنه یې وکړه.

ورته وخت، د پکتیکا ولایتي مسولین هم تاییدوي چې د ښرنې ښار کوچنی دی او د خلکو لپاره په کې اړینې اسانتیاوې نشته دي.

د پکتيکا مرستيال والي مخدوم عبدالسلام سعادت وويل چې د ښاروالۍ د عمومي رياست د پلان له مخې به د ښرنې ښار څلورو خواو ته پنځه کيلومتره پراخ او ماسټر پلان به تطبیق شي.

هغه زیاته کړه: «زموږ د ښرنې ښاروالۍ سږ کال اووه پروژې درلودې چې شاوخوا اووه میلیونه افغاني لګښت یې وکړ که څه هم د تېر په پرتله ښار کې ډېر تغییر رامنځته شوی، خو ډېر ژر به د ښاروالۍ د عمومي ریاست تر سرپرستي لاندې ښار ته پراختیا ورکړل شي.»

د مرکز ښرنې اوسېدونکي دا هم وایي چې په دغه ښار کې جوړ شوي مارکېټونه غیرمعیاري دي او د ښاروالۍ د قوانینو مطابق نه دي.