<p style="text-align: justify;">کابل (پژواک، ۱۴ وری ۱۴۰۴): د افغانستان له ۱۹ کلنو کم عمره کرکټ ملي لوبډلې د درېیو یو ورځنیو سیالیو په لړ کې په خپله لومړۍ لوبه کې نیپال ته د ۱۳۰ منډو په توپیر ماتې ورکړه.</p>
<p style="text-align: justify;">دغه لوبه چې نن په نیپال کې ترسره شوه پچه یې افغان لوبډلې وګټله او لومړۍ یې د نیپال پر وړاندې د توپوهنې پرېکړه وکړه.</p>
<p style="text-align: justify;">په یاده سیالۍ کې افغان لوبډلې لومړۍ توپوهنه ترسره کړه او په ټاکل شوو ۵۰ اورونو کې یې د ۹ لوبغاړو په سوځېدو سره ۳۰۰ منډې وکړې.</p>
<p style="text-align: justify;">د افغانستان له لوري په توپوهنه کې فیصل خان ۹۷، خالد احمدزي ۷۶، برکت ابراهیمزي ۳۵، عذیر خان ۲۴ او عزیز الله میاخېل ۲۱ منډې جوړې کړې.</p>
<p style="text-align: justify;">په مقابل کې ورکړل شوې هدف د نیپال ۱۹ کلنې لوبډلې پوره نه کړای شو او په ۴۷م اور کې د ټولو لوبغاړو په سوځېدو سره یې ۱۷۰ منډې جوړې کړې او ۱۳۰ منډو په توپیر یې افغان لوبډلې ته لوبه وبایلله.</p>
<p style="text-align: justify;">د افغان لوبډلې په ګټه په توپ اچونه کې زیت الله شاهین، محبوب خان او واحدالله ځدراڼ ۲-۲، عبدالعزیز خان، نظیف الله امیري او نصرت الله نورستاني بیا د نیپال یو-یو لوبغاړی وسوځول.</p>
<p style="text-align: justify;">د یادونې ده، افغان لوبډله به راتلونکې یکشنبه له نیپال سره دویمه یو ورځنۍ سیالۍ ترسره کړي.</p>
<p style="text-align: justify;"></p>
